Базардың екі қызметкері күні кеше кешкі сағат беске таман кәріз құдығын тазалауға кіріседі. Төмен қарай алдымен біреуі түсіп, көп ұзамай улы газдан есінен танып құлаған. Екіншісі көмекке ұмтылғанымен, ол да сонда талып қалған.

Екеуінің нәжіс толы шұңқырда жатқанын сол маңдағы саудагерлер көрген. 10 минуттай алысып, әзер шығарыпты. Алғашында демі болғанымен, кө ұзамай жан тапсырған.

Ақбөпе Қызайбекова, саудагер:

— Өзім бірінші көмек көрсеттім. Екеуінің де жүрегіне массаж жасадым , жедел жәрдем жеткенше. Артынан үзіліп кетті. Бастықтары «тазала» деп, тазалауға келген. Бірақ қауіпсіздікті сақтамаған, бастықтары да сақтамаған. Ол жерге қандай жағдайда да жұмысшының аузына распиратор алып беру керек еді. Тұншығып қалу қаупі бар. Тайып кету қауіпі бар. Қауіпсіздік белдігін алып беру керек еді.

Марқұмдардың бірі 55-те, екіншісі 44 жаста. Кішісінің артында жұбайы мен 8 баласы қалды. Тоғызыншысына жүкті екен. Қазір осы қайғылы оқиға бойынша полицейлер тергеу жүргізіп жатыр.

Салтанат Әзірбек, Алматы қаласы ПД ресми өкілі:

— Аталмыш дерек бойынша ҚР ҚК 156-бабы 4-тармағы бойынша қылмыстық іс қозғалды. Еңбек қорғау тәртібін бұзу дерегі. Түрксіб ауданы ПБ арнайы тергеу тобы құрылды.

Қол астындағы қызметкерлерінің кәріз құдығына неге қорғаныш құралдарынсыз түскенін базар басшылығынан білгіміз келіп еді, іздеп жүріп таба алмадық.

Базар аумағында жүргенімізге екі сағаттан асты. Әдетте бұл жолы бірден келетін күзет мүлде көрінбеді.

Ал әкімшілік ғимаратындағы басшылардың есігі түгел жабық. Келгенімізді олар біледі екен, бірақ жауап беретін ойы да жоқ.

Қайғылы жағдайға қатысты қылмыстық іс қозғалып, тергеу жүріп жатыр. Сараптаманың қорытындысынан кейін ақ-қарасы анықталады. Екі адамның өліміне әкелген еңбекті қорғау қағидаларын бұзу бабына сәйкес жауаптылар 7 жылға дейін мерзімге бас бостандығынан айырылуы мүмкін.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!