«Стандард Сити» деп аталатын тұрғын үй кешенінің құрылысына үлескер ретінде ақша салып, үш жыл бұрын баспаналы болған тұрғындар енді мұнда жолағанына өкініп жүр. «Үйдің жертөлесі нәжіс суға толып, шыбын-шіркей мен тарақан басты» - дейді. Сондықтан жұрт апта өтпей ақша жинап, «өзіміз тазалауға мәжбүрміз» деп налиды.

«Салынғанына төрт жыл ғана болған құрылыс — сапасыз» деген тұрғындар қабырғалардың қақырап жатқанын айтады. Бүтін қабырғаны ұстасаң, қаңылтыр құсап сілкініп жатқанын көрсеткен олар, үйдің жан-жағы мүжіліп жатқанын айтады.

Үйдің қасбетіндегі жабындылар мен суағарлар да титтей желге ұшатынын айтқан тұрғындар, ауа райы қолайсыз кезде аулада жүру қауіпті деп отыр. Ең сорақысы, үйдің іргетасы ажырап, көпқабатты тұрғын үй біршама қисайғанын айтады.

Шолпан Алпысбаева:

— Кафелі түсіп қалған. Үйдің іші-сыртында да сапа жоқ. Ішінің қабырғалары сөгіліп кеткен. Оны қалай жамайды, тұрғызады, мен түсінбеймін. Үй кәдімгідей қисайып тұр. Алдында да қисық болатын. Одан кейін мүлдем қисайды, тіпті көзге түсе бастады.

Тұрғындар шулаған соң, жетіп келген мердігерлер көліктен түсер-түспес, жұрт құрылысты салғандарға шүйлікті. Үйдің іші-сыртындағы бүлінген жерлерді нұқып жүріп көрсетті.

Үйдің жертөлесінен бастап аралаған мердігер бірде-бір айыппен келіспейді. Құрылыс жобасы бойынша салынғанын айтқан ол «бетонды аяған емеспіз» дейді. «Су жіберетін құбырларды біз емес, ПИК істеуі керек» деген мердігер, қабырғадағы жарықтар «жоспар бойынша жарылып жатыр» дейді.

 Дмитрий Махотин, «Оңтүстік Құрылыс Сервис» компаниясының бас инженері:

— Үйдің іргетасынан бастап, қабырғасына дейін болаттай берік. Кез келген құрылыс салынған соң, бірер жылда отырады. Ол қорқынышты емес. Біз бұл үйлерді зерттеп, арнайы мамандарды да шақыртқанбыз. Үйде тұру қауіпсіз. Ал қасбетіндегі ұшқан жабындыларды біз ауыстырып береміз.

Мердігерлер осыған дейін үйдің ауласы мен ішіндегі ақауларды анықтап, 13 түрлі жұмысты бүгін-ертең бастайтынын айтады. Яғни оларға сенсек, шілденің соңына дейін су кетіп жатқан тұстарды мықтап бекітіп, ауланы абаттандырып береді.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!