Тура он жыл бұрын құрылыс алаңында 53 жастағы Михаил Мельниктің аяғына тас плита құлаған. Үгітілген сүйектерін дәрігерлер жинап, салғанымен, кейін іріңдеп, бір аяғын кесіп тастады. Қазір екінші аяғы да ісіп, арбасыз жүре алмайды. Ұядай ғана жатақхана бөлмесінен далаға шықпағалы да көп болыпты. Үшінші топ мүгедегі ретінде алатын 50 мың теңге ас-суыма жетпейді дейді ол. Комиссия жұмысқа жарамсыздығына байланысты тексеруді қайта өткізуді талап етеді.

Михаил Мельник:

— Қазір алатын зейнетақым ештеңеге жетпейді. Азық-түлік алсам, ай сайынғы коммуналдық төлемдерді өтей алмай отырамын. Елу мың теңгеге не аламын? Ең болмағанда, екінші топқа ауыстырса, жиырма мың теңгеге зейнетақым өсер еді ғой.

Михаил мүгедектер арасындағы жүзуден ел чемпионы. Ұлттық құрама сабында болып ай сайын мемлекеттен 120 мыңдай сыйақы алып келген. Соңғы екі жылда жаттығуға баруды мүлдем қойып, жарысқа да шықпады дейді әріптестері.

Нұрсұлтан Елеу, мүгедектерге арналған спорт клубының әдіскері:

 — Осы бірінші орын алғаны үшін ол кісіге 40 айлық көрсеткіш тағайындалды 2021 жылы. Сол келесі 2022 жылға дейін алған болатын. Енді әр спортшы жаңағы стипендиясын жалғастырып алу үшін келесі жылға да өз нәтижесін көрсету керек. Республикалық орындар алу керек.

Спортшының мүгедектік тобын өзгерту үшін учаскелік дәрігері өтініш айту керек. Комиссияға емхана өкілдері келтірген дәлелдері қажет дейді әлеуметтік қызмет көрсетушілер.

Жасұлан Өлмесеков, Ақтөбе облысы жұмыспен қамту және әлеуметтік бағдарламалар басқармасының бөлім басшысы:

— Анатомиялық деңгейіне байланысты үшінші топтағы мүгедектігі белгіленді. Себебі осы жағдайларды кемістік деңгейі бойынша белгіленген қағидаларына сәйкес, тек қана үшінші топтағы мүгедек белгіленеді.

Михаил Мельникке төрт жыл бұрын бір рет протез салып берген. Одан соң өтініш айтпады дейді шенеуніктер. Енді спортшының жайымен өзіміз арнайы айналысамыз деп уәде беріп отыр. Ал мүгедектік тобының өзгеруі немесе сол күйі қалу комиссия қортындысына байланысты болады.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!