— Мынаны қимылдатсаң қимылдап кетеді. Құлайын деп тұр. Жер сілкінсе, мынау құлайды.

Көпқабатты тұрғын үйдің ішкі қабырғалары қолмен ұстағанға жел кезіндегі қамыстай қимылдап жатыр. Тұрғындар сөзінше, тым сапасыз салынған үйдің қабырғалары қақырап, едендері ойылып кеткен. Бақытжан Нұсқабаев түсқағаз астындағы сызаттарды көрсету үшін жапсырманы алмақ болып еді, қалай болса жабыстырылған онысы оңай алына салды.

Бақытжан Нұсқабаев:

 — Түсұағазды қалай болса солай жабыстырып кеткен. Әшейін алынып жатыр, жұлынып жатыр. Дұрыстап жабыстырмаған, түкірікпен жабыстырған сияқты. Мынаның бәрі жарық. Мынаның бәрі екі жылдың ішінде осындай боп кетті. Жел тұрса, терезенің бәрі қимылдап, мынаның бәрі су болады.

Жауын-шашын бұл үйдің тұрғындары үшін нағыз азап. Себебі, су терезе түгілі қабырғадағы саңылаулардан өтеді дейді. Тұрғындардың көбі су өтпес үшін қабырғаларын қалыңдатуға мәжбүр.

— Мыналардың бәрінен жаңбыр әр жаңбыр жауған кезде су өтеді. Қайтадан бұзып, қайтадан қалтадан ақша шығарып жөндеп жатырмыз. Электр желісін қайта жүргізіп, жатырмыз. Мынаның бәрі сапасыз.

Тұрғызылғанына төрт жыл ғана болған үйдің сыртының да алқам-салқамы шыққан. Былтырғы жер сілкінісінен кейін іргетасы ажырап, қасбеті ұша бастаған. Еңісте тұрған үйге жауын жауса су жиналып, жертөлесі тіпті құрғамайды екен. «Мердігер мекеме өкілдерінің уәдесінен шаршадық» - дейді қажыған жұрт.

Меруерт Мамытбаева:

— Мен өз басым 15 жылға алғам ,кезінде ипотекаға, бірақ бұл үй 15 жылға жарамайды. 6-7 жылда қирап қалады. Былтыр, мысалы ,жер қимылдаған кезде іргетасының бәріне сызат түсті. Ажырап кетті. Құрылыс компаниясының өкілін шақырған кезде желімін жағып кетті де қалды. Әр келген кезде бір шелек желіммен келеді. Сосын қолында көбігі болады, соны жағып кетеді.

Бұл үйді бюджеттің 750 млн теңгесіне салдырып, өздері қабылдап алған құрылыс басқармасы да «СПМ-Қызылорда» деп аталатын компанияға ақауларды көрсетіп, «бірнеше мәрте ескерту жасадық» дейді. Бірақ мердігер тіпті селт етпеген көрінеді.

Шыңғыс Жасұзақов, Шымкент құрылыс басқармасының бас маманы:

— Міндетін атқармағаны үшін бес пайыз айыппұл дық салынды. Оның сомасы жобада 36-38 млн айыппұл, төлеген жоқ. Даулап сотқа дейінгі хаты жолданып, қазір міндетін атқармағаны үшін сотқа талап-арыз жолданды.

Енді жосықсыз құрылыс компаниясының жауапкершілігін сот қарайды. Ал әкімдік пен мердігерге жәутеңдеген жұрт ипотека төлеп біткенше, үйіміз құламаса деп тілеп отыр.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!