Интернет алаяқтарына жем болғандардың бірі — Нәзира Берікболова. Үржар ауданындағы мектептердің бірінде мұғалім болып істейді. Оның айтуынша, белгісіз азамат қоңырау шалып, өзін банк қызметкері ретінде таныстырыпты. Артынша, ол атына несие рәсімделіп жатқанын жеткізген. Ал оны жою үшін ұялы телефоннан арнайы бір бағдарламаны көшіруін сұраған. Осылай арам ойын жүзеге асырған алаяқтар 9 млн теңгені қалтасына басқан.

Нәзира Берікболова:

— 4-5 млн теңге кредит сұрағанмын. Бірақ маған сіздің айлығыңызға ешқандай кредит шықпайды деді. Содан сәуір айында осындай жағдайға түсіп отырмын. Маған 9 млн. теңге алаяқтықпен аударған. Қалайша менің кішкентай айлығыммен маған 9 млн. теңге іліп тастайды? Бір мезетте төрт банк, микроқаржы ұйымы.

Алаяқтардың арбауына түскендердің көбі мұғалімдер мен зейнеткерлер. Аудандарда тұратын қараша әділдік іздеп Семейде сабылып жүр. Себебі әр қайсына 5 және 9 млн теңге аралығында қарыз қамыты киілген. Алайда олар тергеу ісі сыйырқұйымшақтанып кеткенін айтып зар қағады. Тіпті кейбірінің қолында ақша шешкен азаматтардың фотосы да бар.

Эльмира Садықова, Аягөз ауданының тұрғыны:

— Алматыдан шешілген. Міне, фотосы бар. Мекенжайы да тұр. Сотқа екі рет жүгіндім. Сот шешімін өздеріне шығарып отыр. Бұл адамды неге іздемейді? Неге заң жүзінде жауапкершілік жоқ?!

Ал тәртіп сақшылары интернет алаяқтарын қолға түсіру қиын екенін жеткізді. Себебі киберқылмыскерлер көбінесе арам пиғылдарын өзге елде отырып жүзеге асырады екен.

Әсет Егеубаев, Абай облысы ПД Криминалдық полиция басқармасының жедел уәкілі:

— Жыл басынан бері 345 интернет алаяқтығы тіркелді. Оның 62-сі сотқа жолданды. Егер дроппер анықталған жағдайда, жәбірленушілердің қаражаты сол арқылы қайтарылады. Қазір интернет алаяқтары іздестіріліп жатыр.

Тіркелген деректер бойынша интернет алаяқтары жәбірленушілерден 120 млн теңгені қалтаға басқан. Тек оның бес жарым миллионы ғана қайтарылды. Енді, алаяқтардың құрығына ілініп, есепшоттары бұғатталғандар құзырлы органдардан көмек сұрайды.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!