Бауыржан Сыздықов, ҚР Төтенше жағдайлар вице-министрі:

— Ол жерде оқиға таңғы сағат 4:10-да болған. Бірақ, өкінішке қарай, ол хабар бізге 06:08 түскен. Демек екі сағаттан кейін деп айтсақ та болады. Біздің күштер мен құралдарымыз санаулы уақытта, санаулы минутта жетті. Бірақ, өкінішке қарай, сол мекеменің қызметкерлері біздің құтқарушыларды ішке кіргізбеуге тырысқан. Сондықтан оларға қазір әкімшілік шара қолданылып жатыр. Әкімшілік іс қозғалды.

20 шілде таңғы сағат 4-тен өте феррқорыту зауытындағы №1 пештен қатты жалын шығып, сол жерде жүрген сегіз жұмысшыны қатты күйік шалған. Қызметкерлері ауыр жарақат алғанын білсе де, кәсіпорын басшылығы бірден кәсіби құтқарушыларды шақырмай, мекеменің штаттағы мамандарының күшімен құтқарып қалмақ болған дейді. Бірақ онысынан түк шықпай, 21 мен 43 жас аралығындағы сегіз адам күйіп қалған. Оның төртеуі көп ұзамай, жансақтау бөлімінде көз жұмды. Кәсіпорындағы оқыс оқиғаны дер кезінде хабарламағаны үшін енді төтенше жағдайлар министрлігі зауытқа 200 айлық есептік көрсеткіш мөлшеріндегі айыппұл салады. Апаттың мән-жайын арнайы құрылған комиссия әлі тексеріп жатыр. 

Бізді Youtubе-та қараңыз! Бізді Facebook-та, Instagram-да, Telegram-да оқыңыз!