Бірі хирург, бірі эндокринолог, енді бірі нарколог болуды армандаған бұл жастар әл-Фараби атындағы Қазақ ұлттық университетінің медицина факультетіне оқуға түскен. Енді қалаған маман иесі атану жолында кедергіге тап болып отыр. Бес жылдық бакалаврды, артынша бір жылдық интернатураны бітірген түлектер биыл резидентураға түсе алмай, тығырыққа тірелген. Өзге медициналық жоғары оқу орындары ұлттық университет түлектері интернатураны жеткіліксіз оқыған деп отыр.

Айдана Пазылбек, ҚазҰУ түлегі:

– Бір жылдық интернатураларыңыз жарамсыз, екінші жыл барып оқып келіңіздер деп отыр. Диплом қолдарында. Мемлекеттік үлгіде. Оны қайтадан келіп ол дипломды, ол құжат қой, мемлекеттік құжат, оны қоқсқа тастап, екінші жыл оқи берейік деген нәрсе дұрыс емес, процедура бұзылады, заң бұзылады.

Ұлттық университетті келер жылы тәмәмдайтын 80 студент де қазірден дабыл қағып отыр. Өйткені резидентураға түсу бұларға аса маңызды. Оны оқымаса, нақты бір салаға бейімделген маман бола алмайды. Яғни тек жалпы тәжірибелік дәрігер болып қалмақ.

Әлия Құдайберген, ҚазҰУ түлегі:

– Менің бес жылдық оқуым зая кетпек. Себебі ар жағында мен жалпы тәжірибелік дәрігер болуға ғана құқым қалып тұр. Жылына миллион 70 мың төледім. Интернатурада баға одан да үлкейеді. Миллион 700 мың сұрайды.  Мен соны төлеуім  керек. Және одан кейін жылдар бойы төленген ақшаммен әрі қарай мен жеке мамандық ала алмаймын.

Сөйтсе Қазақ ұлттық университеті жастарды медициналық білім берудің жаңа стандартымен оқытыпты. Соған сәйкес, бакалаврдан кейін оқылатын интернатура бір жылға қысқартылған. Енді оқу орнының басшылығы өз түлектерінің резидентураға қабылдануын сұрап, денсаулық сақтау министрлігіне хат жолдаған.

Алтай Қазмағамбетов, ҚазҰУ академиялық мәселелер жөніндегі проректоры:

– Хат жаздық, нәтижесін күтіп отырмыз. Егер де ДСМ шешімі болса, оқыт деген, онда біз оқытуға біз дайынбыз, тағы бір жыл. Себебі балалар бәрі ақылы түрде оқыды, бір жыл. Енді тағы бір жыл оқыт десе, оқытамыз.

Денсаулық сақтау министрлігі жастарға мерзімінен бұрын диплом берген университетті айыптады. Себебі, бұл түлектер оқуға түскен кездегі талапқа сәйкес, 7 жыл толыққанды білім алуы керек екен.

Әсет Ізденов, ҚР ДСМ Ғылым және адами ресурстар департаментінің Медициналық білім басқармасының басшысы:

– Білім туралы заңға сәйкес, олар университетті оқуға түскен кездегі бағдарлама бойынша аяқтауы керек. Сол кезде 7 жыл оқуы керек деп белгіленген болса, сол 7 жылды толыққанды оқып шығуы тиіс. Кейінірек қолданысқа енген бағдарламаның бұл түлектерге қатысы жоқ. Сондықтан интернатураның тағы бір жылын оқып келсін. Содан кейін ғана резидентураға түсе алады.

Ал, түлектер қажетті білімнің бәрін "бір жыл ішінде алып қойдық" деп отыр. Әрі тағы бір жыл ақылы оқуға ешқайсының құлқы жоқ. Сондықтан қолда бар дипломмен резидентураға қабылдауды талап етеді. Айта кетейік, оның өзін таңдаған бағытына қарай, резиденттер 2 жылдан 4 жылға дейін оқиды.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!