Турнир бірден тартысты басталды. Чемпионатты отандық Астана командасы мен Өзбекстаннан келген Буниаткор командасы ашып берді. Доп додасына бұл екі елден бөлек, Ресей мен Қырғызстаннан келген жас спортшылар да қатысып жатыр. 

Жасыл алаңда жасындай жарқылдаған аяқ доп шеберлері үш күнге жалғасқан бәсеке барысында өзара кіл мықтыны анықтады. Қатысушылар тас түйін дайындықпен келген. Тартысты ойын көрсетті.

Костантин Истомин, «Қайрат» жасөспірімдер командасының бас бапкері:

— Бұл топ үш жыл қатарынан турнирге қатысып жатыр. Бірақ мен бұл командамен бірінші жыл шығып тұрмын. Жоспармен, кезеңімен күнде дайындалдық. Басты мақсат — халықаралық турнирлерге қатысып, көбірек тәжірибе жинау. Сондықтан турнирдің көп болғаны жақсы. Біз бәріне дайынбыз. Әрине, бастысы — қатысу, бірақ маңыздысы — жеңіс деп ойлаймын. Біз Мәскеуде және Барнаулда болдық. Ол жақтан да жемісті оралдық.

Финалда «Қайрат» пен «Москва-Спартак» командалары арасында тартысты ойын болды. Нәтижесінде 5:3 есебімен көрші елден келген команда жеңіске жетті. Жарысты ұйымдастырушылардың айтуынша, негізгі мақсат —өскелең ұрпақ арасында футболды дамыту мен насихаттау, бұқаралық спорт пен салауатты өмір салтын қолдау. Әрі ел ішіндегі футбол орталықтары мен спорт мектептері арасындағы достықты нығайту. 
Максим Жалмағанбетов, ұйымдастырушы: 

— Турнир төрт жылдан аса уақыт өткізіліп келеді. Басты мақсат — балаларды дамыту және халықаралық тәжірибе жинау. Олардың Қазақстаның бірінші чемпионатына қатысу алдында халықаралық тәжірибесі болғанын қалаймыз. Бұл балалар үшін үлкен мүмкіндік. Сондықтан тәжірибе алмасып кәсіби футболға дайын болып келуін қалаймыз.

Жарыс нәтижесі бойынша жеңімпаз командалар арнайы медальмен қоса кубоктарды иемденді. Ал қалған қатысушылар естелік сыйлықтармен марапатталды.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!