Аумағы 12 гектарды алатын креативті индустрия паркі кино саласындағы түрлі мәселелердің шешілуіне мүмкіндік береді. Яғни таланты бар, бірақ мүмкіндігі жоқ жастар мұнда келіп түрлі идеясымен бөліседі. Арнайы қосымша арқылы фильмдерге саундтрек құрып, актер, локация таңдайды. Осылайша киноиндустрияны дамытуға үлес қосады. Нұрғиса Андасбек те бұл мектепке өз жобасын ұсынған.

Нұрғиса Андасбек:

— Сторивижн сценарийдің негізінде раскадровка жасап береді. Қолмен бұрынғыдай салып отырудың қажеті жоқ. Негізгі кадрлардың бәрін EA генерация жасап беретін болады. Екінішісі скетчвижн деп аталады. Ол художниктерге арналған. Адам өзі стилуспен сурет салса, ЕА соның жанында генерация жасай береді.

Бастапқы кезеңде шығармашылық орталық 120-ға жуық студентті шыңдауды жоспарлап отыр. Парк америкалық Нью-Йорк фильм академиясымен бірге жұмыс істейді. Сондықтан түлектердің алғашқы оқу жылын Америкаға барып оқуға мүмкіндігі бар.

Ғани Нығыметов, Алматы энергетика және байланыс университетінің ректоры:

— Біздің университетіміз энергетикалық университет, техникалық университет. Бірақ алдымызға жаңа мақсат қойып отырмыз. Жаңа мақсатымыз – креативті индустриялардың бір жаңа бір білім орталығы болу. Осы мектептің негізінде біз кино саласының маманы, дизайн, анимация дейміз, жасанды интеллект, робототехника – осы мамандықтар бойынша кадр дайындаймыз.

Дэн Маклер, New York Film academy вице-президенті:

— Қазақстандық жастардың талабы зор. Мені қуантқаны, жастар ұлттық мәдениетті, өнерді дамытқысы келеді. Соны креативті индустриямен байланыстырсам дейді. Сіздерде киноиндустрия даму кезеңіне шықты. Міне, көріп шықтық. Қаншама стартап жобалар ұсынып отыр. Біздің университетті қазақстандық 400-ге жуық адам бітіріп шығыпты. Барлығы кәсіби мамандар. Біз өз тарапымыздан тәжірибе алмасуға әзірміз. Мамандарды бірігіп дайындаймыз.

Ал үздік деп танылғандарына кәсіпкерлер қаржылай сыйақы береді. Айта кетейік, креативті индустрия паркі киногерлерден бөлек, сәулет, сызу, сурет салу, сәнге қатысты мамандарды да даярлайды. Орталық келесі жылдан бастап шәкірттерге есігін ашады.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!