Бұл күйеуінің қолынан қаза тапқан Әл-Бейненің анасына жіберген соңғы сөзі. Алматыдағы өмірін тозақпен теңестіруіне себеп жетеді. Жақындарының айтуынша, қайғылы жағдайға дейін де сүйіп қосылған күйеуінен көрген қорлығы көп.

Мағжан Байсейітова, марқұмның анасы:

— Қызымның мойнынан көгерген іздерді көріп, «мынау не?» деп сұрадым. «Күйеуім мені тұншықтырды» деді. Кейін «Анашым, мен оның тоқтаусыз қадағалауынан шаршадым. Тіпті үйден шыға алмай қалдым. Ол мені ешқайда жібермейді. Киім алайын десем, «саған қажеті жоқ» деп бетімді қайтарады. Оның ойлағаны ақша ғана. Тапқанымды қайта-қайта сұрай береді» деген.

Марқұм Әл-Бейне Зарипова көзі тірісінде ақшадан тарықпаған. 42 жасында қаржыгер болып жұмыс істеп, өз көлігі, бір емес — үш пәтері болыпты. Кейін екі қабатты зәулім үй салып алған. Әл-Бейненің өмірі осы өз үйінде үзілді.

31 қаңтарда шетелден Алматыға келгеннен кейін екеуінің арасында кикілжің туындаған. Тергеу мәліметінше, 48 жастағы Сабыржан Зарипов әйелін қызғаныштан пышақтап тастаған.

Нәйлә Қанатова, прокурор:

— Зарипова Дубайда басқа жігіт тапқанын, ал онымен ажырасқысы келетінін айтқан. Кәмелетке толмаған қызы екінші қабатта ұйықтап жатқан соң, сөйлесу үшін жертөлеге түседі. Зарипов әйелінен “ұялмайсың ба?” десе, ол ұялмайтынын айтып күлімсіреген. Қызғаныштан оң қолына пышақ алып, күтпеген жерден Зарипованың мойнына, жамбасына, ішіне сұғып алған.

Прокурордың сөзінше, кейін күйеуі Әл-Бейненің телефонын пайдаланып, есепші болып жұмыс істеген компанияның шотындағы 4 миллион 700 теңгені өзіне аударып алған. Сабыржан Зарипов қазір екі баппен айыпты танылып отыр. Бірі — ұрлық, екіншісі — адам өлтіру. Алайда жәбірленуші тарап қылмыстың қызғаныштан, аффект жағдайында болмағанына сенімді. Сондықтан аса қатігездікпен адам өлтіру бабына ауыстыруды талап етіп отыр.

Ерік Жүсіпов, марқұмның інісі:

— Денесінің бәрі кесіліп кеткен. Әсіресе жыныс мүшесін кескілеп тастаған. Бетінің де сау-тамтығын қалдырмапты. Көзінен иегіне дейін тілінген. Тіпті сүйегі көрініп тұрды.

Қылмысынан кейін Сабыржан Зарипов 12 жастағы қызын туыстарының үйіне тастап кеткен. Қамқоршы ретінде қарындасы танылыпты. Қазір жеткіншек заң бойынша соның қолында. Комиссияның шешімімен марқұмның жақындары онымен мүлде келіспейді. Өйткені жалғыз қызы кәмелетке толмаған, Әл-Бейненің 42 жыл жиып-терген мүлкі күйеуінің туыстарына кетіп қалуы мүмкін екен.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!