48 келі салмақ дәрежесінде өнер көрсеткен парадзюдошы Ақмарал Науатбек чемпион атанды. Спортшы шешуші белдесуде франциялық Сандрин Мартинемен кездесіп, иппонмен жеңіске жетті. Сөйтіп қайсар қыз ел қоржынын тағы бір алтынмен толықтырды. 

Ақмарал Науатбек, паралимпиаданың алтын жүлдегері:

— Әрине, қатты қобалжыдым. Себебі қарсыласым Францияда, өз елінде күресіп жатыр. Өздеріңіз де естіген шығарсыздар, оған деген қандай қолдау болды. Бірақ мен бар үрейімді шегердім де, алтын алдым, өте қуаныштымын.

Ал отандасымыз Сиязбек Дәлиев паражүзуден S5 санатында 50 метрге баттерфляй әдісімен жүзіп өтті. Спортшы қашықтықты 36,42 секундта бағындырды. Енді Сиязбек бар өнерін финалда көрсетпек.

Параканоэдан бірден екі спортшымыз да ширек финалға жолдама алды. Жаңыл Балтабаева 200 метр қашықтықта VL3 санатында сынға түссе, Бейбарыс Сыпатай KL2 санатында 200 метр қашықтықты 48,50 секунд нәтижесімен жүріп өтті.

Үздіктердің қатарында қайсар қыз Зүлфия Ғабидуллина да бар. Ол паралимпиада ойындарында әйелдер арасындағы S4 класында еркін стильде жүзуден финалға шықты. Қашықтықты спортшы 42,85 секундта жүзіп өткен.

Пара дзюдошы Ерғали Шамей жартылай финалда Германия спортшысы Ленарт Сасспен кездескен еді. Отандасымыз қарсыласын 1:0 есебімен жеңді. Ертеңгі күресте Ерғали алтынға таласады.

Ал Даяна Федосова бразилиялық 3 бірдей паралимпиада жүлдегерінен айласын асырып кетті. Алайда қазақстандық дзюдошы финалға өтпеді. Ол енді қола медальға таласпақ.

Париждегі паралимпиада ойындарының аяқталуына екі күн қалды. Жарысқа ұлттық құраманың 44 спортшысы қатысуда. Әзірше еліміз жалпыкоманда есебінде 34-ші орында тұр. Қанжығамызда төрт медаль: екі алтын, қос күміс, қола. 

Бізді Youtubе-та қараңыз! Бізді Facebook-та, Instagram-да, Telegram-да оқыңыз!