Осылайша заң бойынша үш жылға сотталып, өзі бостандықта жүрген азамат қазір ешқайда шыға алмай отыр. Ол жұмысқа орналасу үшін құжаттарын қалпына келтіруді талап етуде. Мән жайды осы өңірдегі КТК тілшісі біліп қайтты.

— Бұл менің үлкен балам — Болатов Махамбет. Мен оның інісімін — Болатов Ержан.

Ержан Болатовтың ағасы бір жыл бұрын Қызылорда қаласына жұмыс істеуге аттанған. Оның артынан жылы киімдерін салып жіберген анасының айтуынша, екінші ұлының құжаты байқаусызда күртешенің қалтасында кетіпті. Онда жүріп ұрлығы үшін қолға түскен оны қалтасындағы құжатпен рәсімдеп қамауға алған. Жырақта жүрген баласынан хабар алмаған ана оның түрмеге түскенін естіп, өзі іздеуге көшкен.

Венера Мұхитдинова, сотталушының анасы:

 — Ол сотқа бізді шақырған да жоқ. Қолға түскенін хабарлаған да жоқ. Соттың болғанын біз білмейміз. Сонда ол баланың айтқаны: «менің осындай айлығымды бермеді, содан амал жоқ, ұрлыққа бардым» деді. Мен емеспін, бұл менің інім деп айтқан. Сөйтіп ол тергеушілер сенбеген бе, әйтеуір інісінің құжатымен тіркеп жіберген.

Сотталушының туыстары оның ұрлық жасап ұсталғанын Тараздағы түрмеге ауысқанда ғана білген. Болған жағдайды туыстарына жеткізген ол тергеу кезінде үйге хабарлауға еш мүмкіндік бермегенін айтқан. Ал жасамаған қылмысы үшін атына қара жағылған азамат заң орындарынан оның атын ақтап алуды талап етуде.

Ержан Болатов:

— Інімнің төлқұжаты деп айтқан. Ол кісілер оған сенбей, Махамбет емес, Ержан қылып соттатып жіберген. Негізі Ержан — мен. Қазір мені ұстап алса, «неге еркіндікте жүрсің, сен сотталған адамсың» деп, мені алып кетуі мүмкін. Мен содан қорқамын.

Мән-жайды білмекке сотталушы жатқан түзеу мекемесіне бардық. Мекеме басшылары қазір құжаттар қайта көтеріліп, тексеріс басталды дейді.

Руслан Уразметов, Жамбыл облысы қылмыстық-атқару жүйесі департаментінің мекеме бастығы: 

— Тергеуші келіп кеткен. Бір апта бұрын. Болатовтан түсініктеме алып кетті, қалай сотталғаны бойынша. Тексеріс жүргізіп жатыр.

Бұған дейін құжаттан шикілік шыққанын сотталған азамат жергілікті прокуратура қызметкерлеріне хабарлаған. Мамандар сарапшылардың көмегімен сотталушының сөзінің растығын анықтапты. Осылайша Қызылорда облысының прокурорлары бұл құжаттарды қайта рәсімдеуді бастаған.

Асылбек Пешеков Жамбыл облысы прокуратурасының басқарма прокуроры: 

— Бұл әу баста сотталғанмен сұқбат жүргізгенде, бірінші ұсталған күні, бірінші оқиға орнына келген полция қызметкерлеріне айтылған, сотталған адамның тарапынан. Бұл жерде қызметкерлердің кәсібилігі болмауына байланысты болмаса, бір мәні бар шығар. Оған құқық қорғау орындарың басшылары құқықтық баға берер.

Мамандар құжаттарды қайта қалпына келтіруге екі айға жуық уақыт кететінін айтады. Ал мұндай олқылыққа орын берген қызметкерлер тәртіптік жазаға тартылуы мүмкін. 

Бізді Youtubе-та қараңыз! Бізді Facebook-та, Instagram-да, Telegram-да оқыңыз!