Ақтөбенің қақ ортасында «үйлі боламын» деп үміттенген үлескерлер неше жылдан бері тәртіп сақшыларының табылдырығын тоздырумен жүр. Елуден аса тұрғын құрылыс компаниясының жарнамасына қызығып, миллиондарын санап берген. Келісімшарт бойынша екі жыл бұрын бес қабатты кешеннің құрылысы бітуі керек еді. Бірақ құрылыс басталған бойда тоқтап қалыпты. Жаңа үйге көшуден дәмеленіп, ескісін сатып сандалып қалған тұрғындар да бар.

Тоқмырза Шайдулин:

— Төрт жыл болды, пәтер жалдап жүрміз. Осы мәселемізді шешіп берсе. 20022 жылы арыз бердім. Содан бері тергеу жүріп жатыр. Түсінбедім, ол неге ұзаққа созылды?!

Үлескерлерден ақша жинаған құрылыс компаниясының басшылары бір пәтерді бірнеше адамға қатар сатқан. Онымен қоймай, құрылысы жүріп жатқан кешеннің жер учаскесін де саудалапты. Жерді үлескерлер соттасып жүріп кері қайтарып алған.

Нағима Икембаева:

— Мысалы, менің 34-ші пәтерімде адам, екі қожайыны бар. Мен емес жалғыз, басқаларының бәрінде солай. Екеуден, үшеуден сатқан. Қазір анықталып жатыр, алаяқтарға ұсталыппыз, анық-қанығына келгенде.

Құрылыс компания басшыларының бұл кешеннен басқа да құрылыстардағы қылмысқа қатысы бар болыпты. Тергеудің ұзарғанына бұл да себеп болған.

Ерболат Сарқұлов, Ақтөбе облысы ПД баспасөз қызметінің жетекшісі:

— Алаяқтық дерегі бойынша қылмыстық іс қозғалып, тергеу жүргізілуде. Бірқатар сараптама тағайындалды. Биыл қараша айында қылмыстық іс сотқа жіберіледі.

Үлескерлер алаяқтардың жазалануы кешен құрылысын қайта жалғастыруға мүмкіндік береді деп отыр. Себебі әкімдік жанынан құрылған мекеме де сот үкімінсіз бұл кешенге жолай алмайды. Алданған үлескерлердің үй құрылысына кірісу үшін алдымен жер учаскесінің иесі — ақша салған тұрғындар болуы тиіс және құрылыс компаниясы басшыларының қылмысы дәлелденуі керек.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!