Зиванзахан Супашева жексенбі күні күндіз үйінен тойға шығып кеткен. Сөйтіп сағат кешкі бес шамасында қонақтар тарқағанда үйіне бет алыпты.

Бақтияр Мақсұтов, марқұмның жиені:

— Сағат бес шамасында тойдан шыққан. Қасындағы сол тойдан шыққан кісілердің айтуынша, олар әпкемізді жолға дейін шығарып салған. Негізінде той болған кафе үйден аса алыс емес, ары кетсе, арасы 200 метр. Ал жолда таксиге отырған-отырмағанын ешкім білмейді. Денесі табылған жер осы үйден он минут жерде, кірпіш зауытының қасында.

Мәйітті осы маңда тұратын әйел бірінші көрген. Оның айтуынша, 56 жастағы Зиванзахан мына жерде жатқан. Ал қолындағы сөмкесі мен тойдан алған сарқыт салынған дорбасы төңіректе жатыпты. Куәгерлер мұнда ешқандай көлік доңғалақтарының ізі болмағанын айтады

Жаңыл Омарова, Қызыл Қайрат ауылының тұрғыны:

— Денесі суымаған, қатпаған. Қайтыс болған түнде адамды әкеліп тастаса, қатып қалу керек еді ғой. Көршім таңғы сегізде келе жатқанда оны көрмеген. Ештеңе болмады, ешқандай көліктің де ізі болмады дейді. Киімі бәрі әп-әйбат, андай-мұндай әйел емес .

Зиванзахан Супашевадан жақындары қапыда айырылып қалғанына әлі сенбейді. Марқұм ұзақ жыл кондитер фабрикасында жұмыс істеген. Артында үш қызы бір ұлы қалды. 

Арман Әбдібеков, марқұмның күйеу баласы:

— Қонақтан шыққандар жаяу жүргінші жолға дейін шығарып салдық дейді. Кафенің қожайыны нан олардың сағат төрт жарымда шығып кеткенін айтты. Мүлдем ауырмаған, денсаулығына шағым болмаған, жүгіріп жүрген. Қыздар тауып алды ғой, оң жақта жатты дейді ғой. Сөмкесі 10-15 метр жерде жатты. Ештеңе ұрланбаған, ақшасы орнында. 

Қара жамылған отбасы әйелдің ішімдік ішпейтінін, басында ешқандай дерті болмағанын айтады. Сондықтан марқұмды әлдебіреу өлтіріп кетуі мүмкін деген болжам жасайды. Бірақ полиция әйелдің денесіне зорлық-зомбылық белгілерін анықтамаған.

Меруерт Морякова, Алматы облысы ПД ресми өкілі:

— Полиция қызметкерлері 56 жастағы әйелдің мәйітін табу фактісі бойынша тергеу жүргізіп жатыр. Аудандық полиция басқармасында қылмыстық іс қозғалды. Алдын ала мәлімет бойынша, денесінде зорлық-зомбылық ізі табылған жоқ.

Марқұмның қазасына қатысты нақты бір дерек айту қиын. Туыстары жуырда шығатын екінші сараптаманың қорытындысын күтіп отыр.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!