Қайғылы оқиға күні кеше Шұғыла шағын ауданында болды. 20 жастағы спортшыны 11 жыл бірге оқыған сыныптасы осы төңіректе пышақтап тастаған. Кеуде тұсынан жарақат алған Әли Серіктің демі дәл осы жерде үзілді. Кешқұрым болған қылмысты көрген көз көп.

Серік Рақышев, куәгер:

— Қансырап жүгіріп құлады осы жерге құлады. Екі жігіт қашты. Артынан бір бала қуды. Таба алмадық деп, екі жігіт келді. Кәдімгідей тірі жатқан. Көз алдымда өлді.

Спортшының кеудесіне пышақ салған онымен тай құлындай тебісіп өскен досы болып шықты.

Ақмарал Табысбекқызы, анасы:

— Жүрек тұсынан ұрған. Төрт рет. Мойнынан ұрған. Қолында екі пышақ болған ғой. Екеуімен ұрған ғой, қол қолдап. Екеуі негізі бір мектепте, бір сыныпта оқыған. Осы үйде ауызашарда, ораза кезінде ауыз ашып, көмектесіп жүрген бала болатын. Әлимен бірге қар күреп жүретін.

Жастайынан спортқа жақын болған Әли Серік өзінің қысқа ғана ғұмырында талай жүлдені қанжығасына байлап үлгеріпті. Әлем додаларында көк туымызды бірнеше мәрте желбіреткен. Небәрі 17 жасында муай-тайдан әлем чемпионы атағын иеленіп, «халықаралық спорт шебері» атанған.

Рамис Ғабитов, бапкер:

— Әли ең жас әлем чемпионы болған. Біз одан үлкен үміт күттік. Ол әрқашан өзінен кейінгі жастарға үлгі болатын. Келер жылы ересектер арасында Қазақстан чемпионаты өтуі керек еді. Әли сол доданы жеңіп, Азия чемпионатында бақ сынағысы келген. Түбінде кәсіпқой спортқа түбегейлі өтуді жоспарлаған еді.

Болашағынан үміт күттіретін спортышының өмірін қиған күдікті бірден құрықталды. Қазір қамауда.

Салтанат Әзірбек, Алматы қаласы ПД ресми өкілі:

— Осы адам өлтіру дерегінің себебін «арамызда туындаған кикілжің, жанжалдың салдарынан пышақ жарақатын келтірдім» деп түсіндірме беруде. Қылмыстық іс жүргізу кодексінің 128 бабының нормалары бойынша бұл азамат қамауға алынды. Қылмыстың басқа да мән-жайы анықталуда.

Әлидің туыстары денені мәйітханадан бүгін алды. Олар тергеудің әділ жүріп, күдіктінің қатаң жазаға тартылуын талап етеді.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!