Қанды қылмыс қаладағы танымал мейрамханалардың бірінде түнгі уақытта болған. Бақылау камерасына жазылған кадрлардан Нұрсұлтан Несіпбаевтың бейтаныс әйелді қалай қорғауға тырысқанын көруге болады. Аяусыз соққылап жатқан ер адамға ескерту жасап, сыртқа шығып кетеді. Сөйтіп араларында жанжал туындап, арты полицейдің өлімімен аяқталды.

Бақыт Жетіген, жесірі:

— Қазақтың қызын қорғаймын деп, өмірі қыршынынан қиылды. Жолдасыммен әлі көретін жақсылығымыз әлі алда еді ғой, мақсаттарымыз алға қойған. Мына бала-шағаны өсіреміз деген мақсатымыз бар еді. Көптеген жақсылық болады деген мақсатымыз бар еді. Енді өкінішті, жастайынан өмірі қиылды...

31 жастағы полицей мейрамханада жұмыстан тыс уақытта жүріпті. Іш құрылысы мен жүрек тұсынан пышақ жарақатын алған азамат ауруханаға жеткізіле салысымен көз жұмған. Оны жоқтап, артында әйелі мен екі ұлы, екі қызы қалды

Рая Жақанова, марқұмның анасы:

— Жолдастарының алдында абыройлы, бауырмал, ағайынның ортасында қамқоршымыз еді, балам. Көп арқа сүйейтін едім, балама. Өзіміздің қазақтың қызын қорғаймын деп, өзінің өмірін қиып, артта аңыратып мені қалдырды. Төрт баласымен, келіншегімен. Мен баламды мақтан тұтамын.

Нұрсұлтан Несіпбаев он жылдан бері ішкер істер саласында қызмет атқарған. Қара жамылған отбасы оның арманы көп еді деп қайғырады. Әріптестері де ер адамның жұмысқа адал, жанашыр азамат болғанын айтып отыр.

Бағдат Құрамысов, Медеу ауданы ПБ аға жедел уәкілі:

— Мен Нұрсұлтанды 2017 жылдан бастап танимын. Екеуіміз жұмысты бірге бастағанбыз. Нағыз жедел уәкіл деп айтсам болады. Жұмысына адал, берік болатын. Әрдайым адамдарға көмектесіп жүретін және де өте ашық жігіт болатын.

Қанды қылмыс жасады деген күдікті қолға түсіп, қамауға алынды. Полицияның айтуынша, ол Өзбекстан азаматы екен.

Салтанат Әзірбек, Алматы ПД ресми өкілі:

— Қатарлас қызметтік тексеру жүргізілуде. Полиция қызметкері жұмыста емес еді. Қылмыстық істің басқа да мән-жайы Қылмыстық іс жүргізу кодексінің 201-бабының талаптарына сай жария етілмейді.

Не де болса, марқұмның жақындары күдіктінің әділ жазалануын сұрайды. Ал оқиға болған мейрамхана иесі тілшілерге жауап беруден бас тартты. Сондықтан күдіктінің мекемеде суық қарумен қалай емін-еркін жүргені, қауіпсіздік қызметі қайда қараған деген сауалдар басы ашық күйінде. 

Бізді Youtubе-та қараңыз! Бізді Facebook-та, Instagram-да, Telegram-да оқыңыз!