Спортшыларымыздың Қысқы универсиадада қарқыны жақсы.  Қазір ел қоржынында алты медаль: яғни 2 алтын, 3 күміс пен 1 қола. Барлығы да могулдан. Отандасымыз Денис Зинов парашаңғышылар арасында он шақырым еркін жүрістен мәреге екінші болып келді. Антон Бондарев та жұптық-могулдың финалында жапониялық спортшыға есе жіберді. Ал фристайлшы қазақстандық екі қыз ақтық сайыста жолығып, Аяулым Әміренова — күміс, ал  Анастасия Городко алтын медальға қол жеткізді. Осылайща Туриндегі 2025 жылғы Универсиаданың екі дүркін чемпионы атанды.

Анастасия Городко Туринде өтіп жатқан Универсиада ойындарында жарқын өнер көрсетіп, жеңімпаз атанып отыр. Жалпы, бұған дейін көрсеткен өнердің бәрінде отандасымыз ешкімге дес берген жоқ.

Бүгін биатлоншылар қоладан айырылды. Аралас эстафетаға қатысқан Никита Акимов пен Полина Егорова алдымен үздік бестік қатарына кірді, содан соң Никитаның дәлдеп атуының арқасында еліміз екінші орынға шыққан. Алайда мәреге бір шақырым қалғанда отандасымыздың күші жетпей, Чехия мен Польша атлеттеріне жол берді. Сонымен қазақ елі медаль жиынтығы бойынша үшінші орынға түсті. Тізімнің басында Франция тұр, одан кейінгі орынға Германия жайғасқан.

Полина Егорова, биатлоншы:

—  Барлық жанкүйерлер мен командадан кешірім сұрағым келеді. Алғашында тым тез жүгіріп кетті. Аздап қобалжыдым, оның үстіне асығыстық таныттым. Бірақ екінші айналымда мен өз қарқыныммен жұмыс істедім. Бәлкім тәжірибемнің аздығынан шығар. 

Ал хоккейден жағдай мәз емес. Жігіттер құрамасы Канададан ұтылса, қыздарымыз 0:10 есебімен жапониялықтардан жеңілді. Бірер сағатта әйелдер командасы өздерінің тобындағы АҚШ  хоккейшілерімен жолықпақ.

Жалпы 2025 жылғы Қысқы универсиада 23-қаңтарға дейін жоспарланған. Туринде 13 спорт түрі бойынша медальдар сарапқа салынса, Қазақстаннан соның он түрі бойынша 103 атлет аттанды.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!