Меркі ауданындағы мектепке дейінгі білім беру орталығының балалары 14 наурыздан бастап ауруханаға жеткізіле бастады. Басы айналып, дене қызуы көтерілген балалар бірінен кейін бірі жұқпалы аурулар ауруханасына жеткізілген. Дәрігерлер ішек инфекциясы табылған тоғыз баланың жағдайы тұрақталғанын айтады. Ал жансақтау бөлімінде жатқан бүлдіршін мен бүгін түскен үш мектеп оқушысына санавиация шақыртылған.

Анеля Мұхаева, Меркі ауданы ауруханасының бас дәрігер міндетін атқарушы:

— Іші өтіп, құсып, дене қызуы көтерілген. Санавиация шақыртылды. Реаниматолог инфекционисі толық құрамда.

Қазір өңірдегі оқыс жағдайға байланысты арнайы жұмыс тобы құрылды. Олар балалардың үйін аралап, инфекцияның таралу аумағын анықтауға кіріскен. Әкімдік мамандары балалар астан уланбаған деген болжам айтуда. Өйткені балалар бір мезетте емес, араға бірнеше күн салып ауруханаға түсті дейді.

Мейірхан Өмірбеков, Меркі ауданы әкімінің орынбасары:

— Астан уланатын болса, олар жаппай уланады ғой. Жаппай ауруханаға түседі. Ал мына жерде 14-і күні бір бала түскен. Келесі күні түседі. 17-сі күні төрт бала түседі. Одан кейін осы ауруханада жағдай тіркелді деп берді. Соған байланысты біз бар жұмысты жүргізіп жатырмыз.

Әзірге мектеп оқушылары мен балабақша бүлдіршіндерінің нақты неден уланғаны белгісіз. Ал сараптаманың алдын ала қорытындысы бірнеше күннен кейін белгілі болмақ.

Қазір балалар жаппай уланған білім беру орталығының есігі тарс жабылған. Мамандар мұнда дизинфекция жүргізілетінін айтады. Ал мұндағы қоғамдық тамақтануды осы орталықтың құрылтайшысы өзі жүргізгені белгілі болды. Қазір тазалық талабын сақтамағаны үшін қылмыстық іс қозғалып, тексеріс жүргізіліп жатыр.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!