Жүктіліктің 30 аптасынан асқанда Әдемі Ешеналиева 5 наурызда қан қысымы көтеріліп Шу ауруханасына жеткізілген. Ал 10 наурызда дәретханада құлап жатқан жерінен дәрігерлер тауып алған көрінеді. 25 жастағы келіншектің өміріне қауіп төніп, жасанды түсік жасап, ЭКО арқылы көтерген тұңғышын алып тастаған деп отыр дәрігерлер. Ал өз өмірі үшін арпалысқан ана 13 күннен бері ес-түзсіз жатып, 22 наурызда көз жұмады.

Алтынай Ешеналы, марқұмның әпкесі:

— Ауруханада жатқан кезде үнемі баласын сұрадым. Қимылдап тұр ма ішіңдегі, ол «қимылдап тұр» деді. 9-ы күні де сұрадым. «Қимылдап тұр» деді. Ол кезде де бала тірі болып тұр ғой. 12- де құлағаннан кейін бала өліп кетіп тұр.

Жантүршігерлік жағдайға байланысты тергеу басталды. Мән-жайды анықтау үшін жұмыс тобы құрылып, тиісті сараптамалар тағайындалған.

Айжан Терлікбаева, Жамбыл облысы денсаулық сақтау басқармасының бөлім басшысы:

— Жамбыл облысы әкімдігінің денсаулық сақтау басқармасында өлім фактісі бойынша жұмыс тобы құрылды. ҚР ДСМ медициналық және фармацевтикалық бақылау комитетінің Жамбыл облысы бойынша  департаменті осы жағдай бойынша тексеру жүргізуде.

Қазір полиция департаменті ана мен бала өліміне қатысты сотқа дейінгі тергеуді бастады. Медициналық қызметті және фармацевтикалық бақылау комитетіне арнайы хат жолданып, дәрігерлердің үстінен қызметтік тексеріс жүргізіп жатыр.

Күні кеше жақынын жер қойнына табыcтап қайғыдан қан жұтып отырған отбасы әйелдің мезгілсіз өліміне дәрігерлерді кінәлайды. Олар жасанды ұрықтандыру арқылы көтерген әйелге ауруханада тиісті күтім жасалмағанын айтып отыр. Ал тағайындалған сараптама мен тексеріс қорытындысы алдағы күндері белгілі болмақ.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!