Мектепте баспалдақтан құлап кеткен оқушыға шұғыл операция жасалды
Қарағанды облысының Денсаулық сақтау басқармасы баспалдақтан құлап кеткен оқушының жағдайы туралы хабарлады.
14:27 06.12.2017
Бала жан сақтау бөлімінде біраз уақыт болып, оның бас сүйек ішіндегі гематоманы алу үшін шұғыл ота жасалды. Қазір науқастың жағдайы тұрақты. Ол Балқаш қаласы орталық ауруханасының травматология бөліміне ауыстырылды.
«2007 жылы дүниеге келген балаға ауруханаға түскенде жілік сүйегі сынған деп диагноз қойылды. Компьютерлік томография гематоманы анықтаған соң шұғыл түрде ота жасалды. Операция сәтті өтті. Қазір науқас жан сақтау бөлімінен ортақ палатаға ауыстырылды. Жұма күні ауруханадан шығуы да мүмкін», - деді Қарағанды облысының денсаулық сақтау басқармасы баспасөз қызметінің жетекшісі Айжан Иса.
Естеріңізге сала кетейік, Балқаш қаласының №16 орта мектебінің 5-ші сынып оқушысы баспалдақтан құлап ауруханаға жеткізілген. Мұғалімдердің айтуына қарағанда, оқушы үзіліс кезінде мұғалімдермен бірге екінші қабаттан бірінші қабатқа түсіп бара жатқанда "аяқ киімімді ұмытып кеттім" деп артына кілт бұрылып тұра жүгіргенде тоңқалаң асып баспалдақтан құлаған. Зардап шеккен оқушыны жедел ауруханаға жеткізді. Оқытушылардың айтуынша, мектепте бұл уақытта қарбалас болмаған және бұл оқыс оқиға.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
