Елімізде «Анықтамасыз қызмет» жобасы іске қосылады
Қазақстанда «Анықтамасыз қызмет» жобасы іске қосылады.
16:42 20.12.2017
Бұл туралы ҚР Ақпарат және коммуникациялар министрі Дәурен Абаев айтты.
«Жалпы құжаттардың мерзімі мен тізбесін қысқартып, қайталанатын рәсімдерді жою, толық электронды форматқа көшу мәселелері бойынша нақты нәтижелерге қол жеткізіп отырмыз. Бұл ретте электронды Үкімет пен «Азаматтарға арналған Үкімет» мемлекеттік корпорациясын дамыту мәселесі айрықша маңызға ие. Осы бағытта атқарылған жұмыстардың нәтижесінде қазіргі күні 746 қызметтің 621-і «Азаматтарға арналған Үкіметке» берілді. Бұл барлық қызметтердің 83 пайызы. Бүгінгі күні осы қызмет түрлерін мемлекеттік корпорацияның 349 кеңсесі ұсынып отыр. Мұндағы 20 мыңнан астам қызметкер жылына шамамен 34 млн-ға жуық қызмет көрсетуде. Сонымен қатар электронды Үкімет арқылы 452 мемлекеттік қызмет қолжетімді болса, құрылған кезінен бастап 192 миллионнан астам қызмет көрсетілді. Бірыңғай байланыс орталығы арқылы миллионнан астам қоңырау қабылданды», - деді министр.
Дегенмен, Дәурен Абаевтың атап өтуінше, кейбір проблемалар да бар. Мәселен, мемлекеттік органдар талап етілетін өнімдерді құру барысында пайдаланылуы мүмкін ақпараттарды жария етуге құлшыныс таныта қоймайды. Сондықтан бұл проблеманы шешудегі бірінші қадам «Анықтамасыз қызмет» немесе Paper free жобасын жүзеге асыру болмақ.
«Бұл жоба барынша қажет етілетін электронды анықтамаларды алып тастауға және мемлекеттік органдар арасындағы өзара іс-қимылды арттыруға бағытталған. Дәл осы мемлекеттік органдардың арасындағы өзара іс-қимылдың төмен болуы салдарынан азаматтар ХҚКО-лар арқылы 2 миллионнан астам электронды анықтамаға тапсырыс берді. Бұл көрсетілген барлық қызметтердің 66 пайыздан астамын құрайды. Яғни, мемлекеттік органдар қажетті анықтамаларды өзге меммлекеттік органдардан алатын болады. Paper free жобасы жүзеге асырылғаннан кейін мұндай қызметтердің саны қысқарады», - деді ол.
Сонымен қатар оның сөзіне қарағанда, аталған проблеманы шешу үшін электронды Үкімет веб-проталында таяу екі аптаның ішінде банктердің, ұйымдардың және жұмыс берушілердің үшінші тұлғалардың жеке мәліметтерін алу тетігі іске қосылады.
«Бұл реттегі аса маңызды сәт азаматтар смс арқылы өзі үшін анықтама алуға рұқсат беруі тиіс. Бұл тетік анықтама үшін бару қажеттігін айтарлықтай қысқартып, ХҚКО-ның операциялық залдарында қарбаласты төмендетеді», - деді Дәурен Абаев.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
