Астана-Павлодар жолында жүк көлігі өртеніп кетті
Екібастұз ауылдық аймағында Шідерті кентіне жақын 105 шақырымдағы автожолда битум тасымалдаған КамАЗ жүк көлігінің кабинасын өрт шалды.
15:34 17.06.2018
Павлодар облыстық денсаулық сақту басқармасының баспасөз хатшысы Эльмира Темірғалиеваның айтуынша, 35 жастағы ер адам ауруханаға жеткізілген.
- Оның денесінің 40 пайызын күйік шалған. Қазір ер адам жансақтау бөлімінде жатыр, - дейді Эльмира Темірғалиева.
Өңірлік ТЖД-ның ақпаратына сүйенсек, төтенше жағдай Астана – Павлодар автобаны құрылысы учаскесінде орын алған. Қызыл жалын сегіз шаршы метрді шарпыған.
- Тілсіз жауды ауыздықтауға бір автоцистерна мен мемлекеттік өрт сөндіру қызметінің жеке құрамынан төрт адам жұмылдырылды, - деді ведомство қызметкері Марал Сағынаева. Қазіргі таңда өрттің шығу себебі анықталуда.
Дереккөз: pavlodarnews.kz
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
