Алматыда көпірдегі лифтінің есігін сындырған күдікті ұсталды
Алматыда көшенің үстінен өтетін көпірдің мүгедектерге арналған лифтісінің есігін теуіп сындырған жасөспірімнің видеосы тарады.
14:24 09.03.2019
Instagram-дағы видео желі қолданушыларының ызасын келтірді. Алматы полиция департаменті өкілдерінің айтуынша, кәмелетке толмаған бұзақы ұсталған. Баланың бұзақылығын телефон камерасына досы түсіріп алған. Instagram әлеуметтік желісінде тарап кеткен видеодан жасөспірімнің лифтінің шыны есігін аяғымен теуіп сындырғанын көруге болады.
"Видеоматериалды зерттей келе, оқиғаның қаланың адам көп жүретін магистральдерінің бірінде болғаны белгілі болды. Тексеріс кезінде 2003 жылы туған кәмелеттік жасқа толмаған О. есімді азамат анықталды. Жасөспірім бұзақылық әрекетінің салдары қандай болатынын білмеген, бірақ бұл ол және оның әке-шешесі жауапкершілікке тартылмайды деген сөз емес", - деп хабарлады қалалық ішкі істер департаментінің баспасөз қызметі.
Полицейлер баланың ата-анасымен профилактикалық әңгіме жүргізген. Белгілі болғандай, 16 жастағы жасөспірім толық және тұрмысы жақсы отбасында тәрбиеленуде. Іс материалы Алатау аудандық полиция басқармасында тіркеліп, жасөспірімді ҚР Әкімшілік құқық бұзу туралы кодексінің 435-бабына сәйкес әкімшілік жауапқа тарту үшін Алматы қаласының кәмелетке толмағандар істері жөніндегі мамандандырылған ауданаралық сотына жіберілді.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
