Мешіттегі атыстан ұсталған 3 күдіктінің терактіге қатысы болмай шықты
Жаңа Зеландияда 15 наурызда бір топ адам екі мешітке баса көктеп кіріп, намазға жиналған жұртқа оқ жаудырған.
10:21 17.03.2019
Құқық қорғау органдары Жаңа Зеландияда теракт ұйымдастырды деп ұсталған үш адамның мешіттегі қанды қырғынға қатысы жоқ деп санайды. Бұл туралы елдің полиция басшысы Майк Буш баспасөз мәслихаты кезінде хабарлады.
Терактіден кейін полиция төрт адамды ұстаған: үш ер азамат және бір әйел. Олардың арасында 28 жастағы Австралия азаматы Брентон Таррантқа кісі өлтіргені үшін айып тағылды. Ол 5 сәуірге дейін қамауға алынған.
Буштың сөзіне сүйенсек, полиция тағы бір ер мен әйелді ұстапты, себебі олардың көлігінен оқ ататын қару табылған. Әйелді босатты, ал ер адамға "оқ ататын қаруға қатысты" құқық бұзушы әрекеттер жасағаны үшін айып тағылды. Үшінші ұсталған адам нәсілдік кемсітушілікке арандатты деген айыппен дүйсенбі күні сот алдына келеді.
"Бұл адамдардың қарулы шабуылдарға қатысы жоқ деп санаймыз", - деп мәлімдеді Буш.
Жаңа Зеландия полициясының басшысы хабарлағандай, теракт болған жерде тағы бір қаза тапқан кісінің денесі табылды. Сонымен, барлығы 50 адам лаңкестіктің құрбаны болған. Ал зардап шеккендер саны – 50, олардың 36-сы ауруханада жатыр: 11 зардап шегуші ауыр халде. Еске сала кетсек, жұма күні Крайстчерчтің екі мешітінде атыс болды. Жаңа Зеландия премьер-министрі оқиғаны теракт деп атады.
Дереккөз: Sputnik
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
