Алматылық дәрігерлер 6 жасар баланың асқазанынан 100 теңгелік тиынды алып шықты
Набира Есенованың мәліметінше, балаларға жедел медициналық көмек көрсету орталығына 6 жасар баласын алып келген әйел ұлының тиынды жұтып қойғанын айтқан.
19:38 18.10.2019
«Баланың асқазаны шұғыл түрде рентгенография арқылы тексеріліп, нәтижесінде кішкентай пациенттің асқазанында 100 теңгелік тиын барын көрсетті. Дәрігерлер баланың асқазанындағы бөгде затты эндоскопиялық жолмен алып шықты», - дейді қоғамдық денсаулық басқармасының баспасөз хатшысы.
Бүгінде бала үйіне жіберілді. Дәрігердің сөзінше, мұндай жағдайлардағы ең қиыны – ағзадан магниттерді алып шығу. Себебі магниттер құралдарға жабысып қалады. Жалпы, жыл басынан бері балаларға жедел медициналық көмек көрсету орталығына организміне бөгде зат түскен 120-ға жуық бала жүгініпті.
Дәрігерлер тиын, түйреуіш, кішкентай шар, конструктор сияқты ұсақ заттарды балаларға қолжетімді жерге қоюға болмайтынын ескертеді.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
