Атырауда әскери қызметші менингиттен көз жұмды
Атырауда көз жұмған сарбаз менингит жұқтырған болуы мүмкін.
08:42 28.10.2019
«26 қазан күні әскери бөлімнің фельдшері әскери қызметшіні ауыр жағдайда облыстық ауруханаға жеткізді. Клиникалық-зертханалық тексерістердің және салалық мамандардың консультацияларынан кейін науқасқа «менингококк инфекциясының күрт асқынатын түрі» диагнозы қойылды. Науқас жансақтау бөліміне жатқызылды. Жүргізілген интенсивті терапияға қарамастан, ол 5 сағаттан кейін қайтыс болды», - деп мәлім етті облыстық Денсаулық сақтау басқармасынан.
Алдына ала мәлімет бойынша, сарбаз медициналық қызметке 26 қазан күні жүгінген. Ол әскери бөлімге 16 қазан күні келген.
«Денсаулық сақтау басқармасы оқиғаның анық-қанығын тексеру үшін комиссия құрды. 27 қазан күні әскери бөлімде эпидемияға қарсы, алдын алу шаралары өткізілді – науқаспен қарым-қатынаста болғандардың барлығын дәрігер қарап шықты, антибиотикопрофилактика басталды. Байланыста болғандардың арасында менингококк инфекциясын жұқтыру белгілері бар тұлғалар анықталған жоқ. Медициналық бақылау жалғасуда», - деді Атырау облыстық Денсаулық сақтау басқармасынан.
Дереккөз: ҚазАқпарат
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
