«5-10-20» тұрғын үй бағдарламасы шілдеде іске қосылады
Жаңа тұрғын үй бағдарламасының шарттары мамырда немесе маусымның басында үкіметтің арнайы қаулысымен бекітіледі.
19:39 14.05.2020
Тұрғын үй құрылыс жинақ банкінің басқарма төрағасы Ләззат Ибрагимова «5-10-20» жаңа тұрғын үй бағдарламасының басталатын уақытын атады.
«Жоспар бойынша мамырда немесе маусымның басында жаңа бағдарламаның шарттары үкіметтің арнайы қаулысымен бекітіледі. Ол "Нұрлы жер" бағдарламасының бір бөлігі болады», - деді Ибрагимова берген сұхбатында.
Оның айтуынша, Тұрғын үй құрылыс жинақ банкі жаңа бағдарлама бойынша жұмыс істеуге дайын. Алайда алдымен бюджеттен ақша бөлінуі керек.
«Біз ақшаның бөлінгенін күтіп отырмыз. Дағдарысқа қарсы жоспар бойынша үкіметтің қаулысын бекіту мен қаржы бөлу сияқты процедуралар бірінші жартыжылдықта атқарылуы қажет. Сондықтан 1 шілдеден бастаймыз деп сенеміз», - деді Ибрагимова.
Айта кетейік, жаңа тұрғын үй бағдарламасына кезекте тұрған адамдар ғана қатыса алады. Бүгінде республика бойынша олардың жалпы саны – 540 мың адам. Соның ішінде мемлекеттік қызметкерлер, бюджеттік мекеме мамандары, толық емес және көпбалалы отбасылар, мүгедектер, зейнеткерлер, әскерилер мен мүгедек баласы бар отбасылар бар.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
