Алматыда перзентханадан өрт шықты
Алматы дәрігерлері нәрестелер жатқан жансақтау бөлімінде өрттің алдын алды.
14:59 19.07.2020
Алматы қаласы Төтенше жағдайлар департаменті өкілінің хабарлауынша, 18 шілдеде сағат 21.47-де "101" пультіне Сейфуллин даңғылы, 492 бойындағы №1 перзентхананың балалар реанимациясы бөлімшесінде өрт болғаны туралы хабар келіп түскен. Осылайша жоғары шақырту нөмірі бойынша ТЖД күштері мен құралдары жіберілген.
"Сол түні кезекшілік атқарған ауысым уақыт жоғалтпай, байбаламсыз іс-қимылға көшті. Акушер-гинеколог Перизат Садықова, балалар медбикасы Арайлым Жиделиева және басқа медицина қызметкерлері жансақтау бөлімінде жатқан сегіз сәбиді қауіпсіз аймаққа эвакуациялады", - деп мәлімдеді ТЖД-дан.
Дәрігерлердің бірі Виталий Грушевский ұнтақты өрт сөндіргіштің көмегімен электр сымдарының өртенуіне жол бермеді.
"Персонал меңгерген дағдылар өрт сөндірушілер келгенге дейін тілсіз жауды ауыздықтауға мүмкіндік берді", - деді ведомстводан.
Алматы ТЖД перзентхана басшылығы мен дәрігерлерге қырағылығы және кәсібилігі үшін алғыс айтты. Өртті сөндіруге қатысқандардың барлығы марапатқа ұсынылады.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!