Қазақстанда коронавирус пен пневмониядан қайтыс болғандар саны артты
Қазір коронавирус инфекциясынан он мыңнан астам адам емделіп жатыр, екі жүзден аса науқастың жағдайы ауыр.
10:03 20.11.2020
Өткен тәулікте коронавирус пен пневмониядан жеті адам қайтыс болды. Бір тәулікте 6 науқас COVID-19 инфекциясынан, бір пациент ковидтік пневмониядан көз жұмды. Сондай-ақ, өткен тәулікте 791 адам вирус жұқтырса, 158 адам пневмонияға шалдықты.
Денсаулық сақтау министрлігінің ақпаратынша, қазір коронавирустан 10 435 адам ем қабылдауды жалғастыруда, олардың арасында 481 бала бар. Стационарларда 3 088 науқас жатыр. 7 347 адам амбулаториялық жағдайда емделуде. Науқастардың арасында 220 адамның жағдайы ауыр, соның ішінде 26-сының хәлі мүшкіл. 21 пациент жасанды тыныс алдырту аппаратына қосылған.
Жалпы 13 наурыздан бері республикада барлығы 123 888 адам індетке шалдықты, 1970 науқас қайтыс болды. 1 тамыздан бері 40 848 адам пневмониямен ауырды, 424 адам көз жұмды.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
