Алматыда қонақ үйде қызын өлтірген әке 20 жылға сотталды

Баракат Мохамедке қатысты үкім 22 желтоқсан, сейсенбіде шығарылды. Сот отырысына төрағалық еткен судья Бақытжан Бәкірбаевтың айтуынша, Баракат Мохамед дәрменсіз күйде болған адамды қасақана өлтірді деп айыпталды.  

«Сот өткен жылдың қазан айында Алматы қонақ үйінде Ұлыбритания азаматы Баракат Мохамед алкогольді ішімдік ішіп, есірткі тұтынғанын, әйелімен жанжалдасқаннан кейін өзінің бір жасар қызын ұрып-соғып, өлтіріп қойғанын анықтады», - деді судья Бәкірбаев онлайн брифингте.

Оның айтуынша, Ұлыбритания азаматының кінәсі куәгерлердің – қонақ үй қызметкерлерінің сөзімен расталған. Қорғаушылардың абайсызда адам өлімі болғаны туралы нұсқасы сараптама қорытындысымен жоққа шығарылды. Нәтижесінде сот Баракатты кінәлі деп тапты.

«Баракат Мохамед Қазақстан Республикасы Қылмыстық кодексінің 99-бабы 2-бөлігінің 3-тармағында көзделген қылмыстық құқық бұзушылықты жасағаны үшін кінәлі деп танылсын және 20 жылға бас бостандығынан айырылсын. Баракат жазасын қатаң режимдегі қылмыстық-атқару жүйесі мекемесінде өтесін. Өтеу мерзімі 2019 жылғы 24 қазанна бастап есептелсін», - деді судья Бақытжан Бәкірбаев. 

Жазасын өтегеннен кейін шетел азаматы Қазақстаннан шығарылып, бес жылға дейін елге келуге тыйым салады. Еске сала кетейік, қылмыс 2019 жылдың 24 қазанында Алматыдағы бес жұлдызды InterContinental қонақ үйінде жасалды. Сол кезде 42 жастағы Ұлыбритания азаматы өз бөлмесінде әйелімен жанжалдасқаннан кейін бір жарым жасар қызын өлімші етіп сабағаны белгілі болды. Қонақ үй қызметкерлері балаға жан бітіруге тырысқан, бірақ одан нәтиже болмады. Қыз дәрігерлер келгенше көз жұмды.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!