Досаев қазақстандықтардың кредиті туралы айтты
Досаевтың айтуынша, экономикаға кредиттер жыл басынан бері қарашаның соңында 14,65 триллион теңгеге дейін артты.
11:15 12.01.2021
2020 жылдың қаңтарынан бері қазақстандықтардың кредиті 10,5%-ке, 7,36 триллион теңгеге дейін өсті. Бұл туралы ұлттық банк төрағасы Ерболат Досаев мәлімдеді.
"2020 жылдың басынан бастап халықтың кредиттері 7,36 триллион теңгеге дейін, 10,5%-ке ұлғайды. Оның ішінде тұтынушылық қарыз 3,2%-ке, 4,3 триллион теңгеге дейін, ипотекалық қарыздар 27,8%-ке, 2,3 триллион теңгеге дейін өсті", – деді Досаев үкімет отырысында.
Айтуынша, экономикаға кредиттер 2020 жылдың басынан бері қарашаның соңында 5,6%-ке, 14,65 триллион теңгеге дейін артты. Ал қысқа мерзімді кредиттер 3,0%-ке, 2,1 триллион теңгеге дейін өсті.
Депозиттер
Банк жүйесіндегі депозиттер 2020 жылдың басынан бері 15,3%-ке ұлғайып, 21,9 триллион теңгені құрады. Депозиттер, негізінен теңгедегі салымдардың өсуі есебінен артқан. Ұлттық валютадағы салымдар 23,1%-ке, 13,3 триллион теңгеге дейін, валюталық салымдар 5,1%-ке, 8,6 триллион теңгеге дейін өсті. Соның нәтижесінде депозиттерді долларландыру деңгейі 2020 жылдың қарашасында 39,3%-ке дейін төмендеді.
Дереккөз: sputnik
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
