Терроризм актісі туралы жалған хабарлама жасағандарға қандай жаза қолданылады

Бұл туралы ҚР ІІМ экстремизмге қарсы іс-қимыл департаменті бастығының орынбасары Дархан Разуев айтты. 

«Қазақстанда терроризм актісі туралы көрінеу жалған хабарлама үшін 5 000 айлық есептік көрсеткішке, яғни 14,5 млн теңгеге дейін айыппұл төлеу немесе осы көлемде түзеу жұмыстарына тарту, сондай-ақ 5 жылға дейін бас бостандығынан айыру немесе шектеу жазасы қолданылады. Осы қылмысты жасағаны үшін 14 жасқа толған балалар қылмыстық жауапқа тартылады. Сондықтан мұны мектеп оқушылары білуі тиіс», - деді Дархан Разуев ІММ баспасөз қызметі алаңында өткен брифингте.

Сонымен қатар оның айтуынша, осындай хабарламаның кесірінен келтірілген барлық шығындар өтелуі тиіс. Мұндай әрекетті кәмелетке толмаған бала жасаған болса, шығынды ата-анасы өтейді.

«Терроризм актісі туралы көрінеу жалған хабарлама – ол әзіл де, ермек те емес. Бұл қылмыстық жазаланатын әрекет екенін тағы да естеріңізге салғым келеді. Жалған хабарлама берілген уақыттан бастап аяқталған қылмыс болып есептеледі. Істерін істеп алып, кейін қанша өкінсе де, қаскөй қылмыстық жауапкершіліктен құтыла алмайды», - деді департамент бастығының орынбасары.

Дереккөз: ҚазАқпарат

Бізді Youtubе-та қараңыз! Бізді Facebook-та, Instagram-да, Telegram-да оқыңыз!