Ақтау маңында жылу электр орталығы өртенді
Маңғыстау облысында жылу электр орталығынан өрт шықты.
10:12 01.06.2022
Облыстық төтенше жағдайлар департаментінің мәліметіне қарағанда 31 мамыр күні кешкі сағат 21.42 шамасында құтқару қызметіне шұғыл хабар түскен.
Онда Ақтау қаласынан 7 шақырым қашықтықта «МАЭК ҚазАтомӨнеркәсіп» жауапкершілігі шектеулі серіктестігі аумағында үшінші жылу электр орталығындағы беті ашық тарату құрылғысынан өрт шыққаны хабарланған.
Қазіргі таңда құтқарушылар өртті сөндіріп жатыр. Қызыл жалын 600 шаршы метр аумаққа жайылған. Зардап шеккен ешкім жоқ.
«Бұл оқыс жағдай өңірді электр энергиясымен қамтамасыз етуге еш әсер етпейді. Кәсіпорын штаттық режимде жұмыс істеп тұр», - деп мәлім етті департаменттің баспасөз қызметі.
Тілсіз жауды ауыздықтауға ТЖД 15 қызметкері мен 6 техникасы, кәсіпорынның өзінен - 4 адам, полициядан тағы 4 қызметкер жұмылдырылған.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
