Өскемен тұрғынының 6 млн теңгесін алған алаяқ ұсталды
Өскемен қаласының тұрғыны өзін риэлтор ретінде таныстырған алаяққа алданып қалған.
08:32 10.06.2022
ШҚО Полиция департаменті баспасөз қызметінің мәліметіне сүйенсек, қалалық ПБ Үлбі полиция бөліміне 53 жастағы тұрғын жүгінді. Өз сөзінде ол алаяққа алданып, 5 900 000 теңгесінен айырылғанын жеткізген.
Белгілі болғандай, жәбірленушіге өзін риэлтор ретінде таныстырған бейтаныс біреу құжаттар көрсетіп, сеніміне кірген. Баспана сатып алуға көмектесетіндігін айтып, уәде берді. Алайда келісім-шартқа қол қойып, қомақты қаржы қолына түсісімен ол мүлде байланысқа шықпай кеткен.
«Жедел-іздестіру шараларының нәтижесінде тәртіп сақшылары 32 жастағы күдіктіні ұстады. Оған қатысты келу туралы міндеттеме түрінде бұлтартпау шарасы таңдалды. Аталған факті бойынша ҚР ҚК-нің 190-бабы 3-бөлігіне (Алаяқтық) сәйкес сотқа дейінгі тергеу амалдары басталған», - делінген ақпаратта.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
