Қарағандыда полицейлерден ақша бопсалаған блогер 3,5 жылға сотталды
Қарағандыда полицейлерден ақша талап етіп, бопсалаған блогерге қатысты сот ісі өтті. Сот айыпталушыға қатысты 3.5 жылға бас бостандығынан айыру туралы үкім шығарды, деп хабарлайды ҚазАқпарат.
09:10 14.06.2022
Тергеу материалдарына сәйкес, 28 жастағы қарағандылық өзінің серіктесімен бірге полицейлердің тәртіп бұзушылықтарын аңдып, оларды видеоға түсірген. Өткен жылдың күзінде олар онда патрульдік полицияның көлігі бағдаршамның тыйым салатын қызыл сигналына жарқылдау белгісінсіз өтіп кеткенін камераға түсіріп алған.
Тергеушілердің айтуынша, айыпталушы бұл бейнені пайдаланып, полиция қызметкерлерін қорқытқан. Ауызбастырық ретінде олардан 150 000 теңге сұраған.
Сол кеште айыпталушы мен серіктесі ақша алғаннан кейін қолға түскен. Белгілі болғандай, бопсалаушыларға ақша бермес бұрын полиция қызметкерлері бұл жағдай туралы Жеке қауіпсіздік басқармасына хабарлаған.
Айғақпен ұсталғанына қарамастан, блогер өз кінәсін сотта мойындамады. Ал оның серіктесі бұған қатысы жоқ екенін және сол күні ол сотталушының қасында жүргізуші ретінде ғана жүргенін жеткізді.
«Қазыбек би аудандық соты ҚР ҚК 194-бабы 2-бөлігінің 2-тармағы бойынша сотталушыларды кінәлі деп таныды. Сот блогерді ең жоғары қауіпсіздік мекемесінде жазасын өтей отырып 3,5 жылға бас бостандығынан айырды. Оның серіктесіне 3,5 жылға бас бостандығын шектеу жазасы тағайындалды. Сот үкімі заңды күшіне енген жоқ», - деп хабарлады Қарағанды облысы Қазыбек би аудандық сотының баспасөз қызметі.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
