Маңғыстауда жол бойындағы жанжалда көлік жүргізушісінің бірі екіншісін ұрып өлтірген
Маңғыстауда жол бермегені үшін ашуға булыққан көлік жүргізушілері жанжалдасып, бірі екіншісін ұрып-соғып өлтірген.
Фото: Gov.kz
09:09 27.07.2022
Облыстық Ішкі істер департаменті баспасөз қызметінің мәліметінше, 35 жасар күдікті 67 жасар ер адамды дене жарақатымен жол жиегіне тастап кеткен.
«Алдын ала болжам бойынша, екі жүргізуші бір-біріне жол бермей, араларында жанжал туындаған. Қылмыстық іске күдікті эмоцияға бой алдырып, көліктен шығып, 67 жастағы жүргізушіні ұрып-соққан. Алған жарақаттарынан кейін жәбірленуші сол жерде қайтыс болды. Осыған байланысты Қылмыстық кодекстің 99-бабы 2-бөлігі бойынша сотқа дейінгі тергеу басталды», - делінген баспасөз қызметінің мәліметінде.
Тергеу сотының санкциясымен күдіктіге қатысты екі ай мерзімге күзетпен ұстау түріндегі бұлтартпау шарасы таңдалған. Тергеу амалдары жалғасып жатыр.
Айта кетейік, оқиға 22 шілде сағат 20:15 шамасында Мұнайлы ауданының Жаңа Дәулет кентінде орын алған.
Құқық қорғау органдарының өкілдері көлік жүргізушілерін жолда туындайтын келеңсіз жағдайларда эмоцияға берілмеуге шақырады.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
