Юлия Путинцева Әбу-Даби турнирінің іріктеу сайысын жеңіспен бастады
Қазақстанның екінші, әлемнің 44-ракеткасы Юлия Путинцева Әбу-Даби WTA 500 турнирінің іріктеу сайысын жеңіспен бастады.
18:37 05.02.2023
Іріктеу сайыстарының 3-ракеткасы болып тіркелген Ю. Путинцева бастапқы кездесуін әлемдік рейтингіде 186-орында тұрған ресейлік Анастасия Захаровамен өткізді.
Қазақстандық теннисші 6:2, 7:5 есебімен жеңіске жетті.
Ю. Путинцева іріктеу сайыстарының финалында рейтингіде 152-сатыдағы өзбекстандық Нигина Абдураимовамен шеберлік байқасады. Оны жеңсе, негізгі жарысқа жолдама алады.
Әбу-Даби додасында Қазақстанның бірінші, әлемнің 10-ракеткасы Елена Рыбакина өнер көрсетеді. 6-12 ақпан аралығында өтетін жарысты ол екінші айналымнан бастап, чехиялық Каролина Плишкова немесе испаниялық Гарбинье Мугурусаның біреуімен кездеседі.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
