Есентай Қалиев Орал қалалық мәслихатының төрағасы болып сайланды
Бүгін Орал қалалық мәслихаты сегізінші шақырылымының бірінші сессиясы өтті, деп хабарлайды ҚазАқПарат.
17:24 30.03.2023
Сессияда Есентай Ғиниятұлы Қалиев қалалық мәслихаттың төрағасы болып сайланды.
Сондай-ақ қалалық мәслихаттың тұрақты комиссияларының құрамы мен төрағалары бекітілді.
Есентай Қалиев 1963 жылы 25 қазанда Батыс Қазақстан облысының Жалпақтал ауданы Жалпақтал ауылында дүниеге келген.
Білімі – жоғары, Орал ауыл шаруашылығы техникумын агроном, Орал педагогикалық институтын география пәнінің мұғалімі мамандығы бойынша бітірген.
Еңбек жолын №17 Фурманов орта кәсіптік-техникалық училищесінде бастап бастауыш комсомол комитетінің хатшысы, агрономия негіздері пәнінің мұғалімі, Фурманов ауданы комсомол комитетінің екінші, үшінші хатшысы, №17 Фурманов орта кәсіптік-техникалық училищесі директорының оқу-тәрбие жөніндегі орынбасары, Жалпақтал ауылдық округінің әкімі, Казталов ауданы әкімінің орынбасары, К.Меңдәлиев атындағы орта мектеп директоры, Казталов ауданы әкімі аппаратының басшысы, Казталов ауданының әкімі сияқты қызметтерді атқарды.
Сондай-ақ БҚО табиғи ресурстар және табиғатты пайдалануды реттеу басқармасында, облыстық мәслихат аппаратында жұмыс істеді.
2021 жылдың 15 қаңтарынан бері Орал қалалық мәслихатының хатшысы болды.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
