Шілдеде елімізде бірнеше жылдан бері болмаған аптап ыстық тіркелді

Температура батыс өңірлерде айдың басында, солтүстікте екінші жартысында, шығыс пен оңтүстік-шығыста айдың ортасында ең жоғары көрсеткішке дейін көтерілді.

8 шілдеде Атырау метеорталығында ең жоғары температура +42,0°С болды, мұндай көрсеткіш кейінгі рет 2011 жылы тіркелген. Ол кезде +41,9°С болған.

10 шілде Оралда күннің ыстығы 2015 жылдан бері қайталанбаған 42,0°С-қа жетті.

11 шілде Ақтөбеде ауа температурасы +42,3°С болып, 2008 жылғы рекордтан асып түсті. Ол кезде 41,0°С ыстық болған.

Қостанайда 10-12 шілде күндері рекорд көрсеткіштер тіркелді. 11 шілдеде ауа температурасы +40,5°С-қа жетіп, 2020 жылғы рекордтан (+37,0°С) асып түсті.

Петропавлда 10-13 шілде аралығында, яғни төрт күн қатарынан аптап ыстық болғанымен, 12 шілде күні термометр бағаны рекордтық +40,0°С-қа жетті. Мұндай температура метеобақылау тарихында бұрын-соңды болмаған. Кейінгі рет максималды жоғарғы температура 1993 жылы тіркелді (+30,6°).

Павлодарда күн 38,5°С-қа дейін ысып, 1981 жылғы рекордты жаңартты. Сол жылы дәл осы күні ауа температурасы 35,0°С дейін көтерілген.

Көкшетауда 12 шілдеде метеобақылау тарихында бұрын-соңды болмаған +39,2°С тіркелді, кейінгі рет ең жоғары температура 2013 жылы 30,5°С болған.

Жезқазғанда үш күн қатарынан күн ысып, оның шарықтау шегі 13 шілдеде тіркелді. Термометр бағаны +44,0°С-қа жетті. 2015 жылы бұл өңірдегі ең жоғарғы температура +39,5°С болған.

Таразда 13 шілдеде максимал ауа температурасы 42,1°С-қа көтеріліп, рекорд орнатылған. Ең кейінгі ыстық 2016 жылдың дәл осы күні тіркелген (+38,1°С).

Өскеменде 14 шілдеде ауа температурасы 39,9°С көтеріліп, 2013 жылғы рекордтан асып түсті. Ол кезде дәл осы күні +34,2°С болған.

Риддерде ол күні термометр бағаны +36,5°С-қа жетіп, 2015 жылғы рекордты жаңартты.

Астана қаласында 11-13 шілдеде екі күн қатарынан жоғары температура тіркелді, ең жоғары көрсеткіш 12 шілдеде (+38,1°С) болды. Дәл осы күнгі мұндай аптап ыстық кейінгі рет 2013 жылы тіркелген. Ол кезде термометр бағаны 32,7°C-қа көтерілген болатын.

Қазақстанның көп бөлігінде жауын-шашын нормадан аз түсті. Дегенмен, батыс өңірлерде фронталды бөліктер күшейіп, нөсер жаңбыр жауды.

16 шілдеде Оралда бір тәулік ішінде екі айлық нормадан көп, яғни 104 мм жаңбыр жауды. Норма – 43 мм болатын. Каменкада бір айдағы норма 26 мм болса, бір тәулік ішінде 133 мм жауын-шашын түсті.

Сонымен қатар, ай бойы Қазақстанның көп бөлігінде 5 балдық өрт тұтану қаупі сақталды. Достық автоматты метеостанциясында (Жетісу облысы) айдың екінші бөлігінде және ай соңында желдің күші секундына 31-38 метрге жетті.

Теміртауда 21 шілдеде жел 32 м/с екпінмен соқты.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!