Акула шабуыл жасаған серфердің денесі табылмай жатыр
Оңтүстік Аустралия полициясы болжам бойынша, акула шабуылынан мерт болған ер адамның мәйітін іздеп жатыр, деп хабарлайды Kazinform.
13:15 01.11.2023
55 жастағы ер адам сейсенбі күні таңертең Эйр түбегіндегі Стрики-Бэй қаласынан оңтүстікке қарай Granites Beach жағажайына жақын маңда серфингпен айналысып жүрген. Куәгерлердің сөзінше, сол кезде оған акула шабуылдаған.
Құтқарушылар жергілікті волонтерлердің көмегімен оның денесін әуе және су іші арқылы іздеп жатыр.
Биыл осы штатта акула адамға үшінші рет шабуыл жасап тұр.
Мамыр айында Стрики-Бэй қаласынан шамамен 120 шақырым жерде акула шабуылынан серфер қайтыс болған еді.
Қазанның басында тағы бір азамат зардап шекті, бірақ аман қалды.
Сейсенбі күні серферге қандай акула шабуыл жасағаны әзірге белгісіз. Бірақ куәгерлердің жергілікті БАҚ-қа хабарлауынша, оның ұзындығы 4 метрден асады.
9News дерегінше, ер адам сол кезде суда болған алты серфердің бірі еді, бірақ ол бәрінен ұзаққа кетіп қалған.
Granites Beach жағажайы Оңтүстік Аустралия штатының астанасы Аделаида қаласынан шамамен 700 шақырым жерде орналасқан.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
