Достық стансысында жүк тиеу терминалдары салынады
Жетісу облысының көлік-логистика саласына ірі инвесторлар тартылып жатыр.
Фото: Мухтор Холдорбеков/Kazinform
12:28 24.11.2023
Бұл өңірдің транзиттік әлеуетін дамытуға зор серпін береді. Бүгін ҚР Президенті жанындағы Орталық коммуникациялар қызметі алаңында журналистер үшін брифинг өткізген Жетісу облысының әкімі Бейбіт Исабаев осылай деді, деп хабарлайды Kazinform.
Облыс әкімінің айтуынша, Достық стансысында құны 12 млрд теңге, қуаты 150 мың контейнерлік «ЕТТ Dostyk» ЖШС-ның мультимодалды көлік-логистикалық орталығы салынды.
«Тағы екі – «Dostyk TransTerminal» және «DAR RAIL Infrastructure» көп функционалды жүк тиеу терминалы перспективалы жобаларын жүзеге асыру жоспарланып отыр», - деді Б.Исабаев.
Сондай-ақ ол «Достық-Мойынты» темір жолының екінші желісі салынып жатқанын айтты. Спикердің сөзіне сүйенсек, осы темір жол тармағының 451 шақырымы Жетісу облысының аумағынан өтеді.
Осы жоба негізінде өңір экономикасына қосымша 293 млрд теңге инвестиция тартылады. 2 мың жаңа жұмыс орны ашылып, онда жергілікті тұрғындарға басымдық беріледі. Бұл ретте негізінен өңір кәсіпорындарының өнімдері пайдаланылатын болады.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
