Атырауда тұрғынды азаптаған полицейлер сотталды

Фото: Polisia.kz

Атырауда жұмыс кабинетінде тұрғынды  ұрып, тұншықтырған полицейлер сотталды, деп хабарлайды Kazinform. 

Атырау қаласының №2 сотында азаптау және азаптауға жәрдемдесу айыбымен 5 полиция қызметкеріне қатысты қылмыстық іс қаралды.

«Полиция қызметкерлері А., М. және Ж. жұмыс кабинетінде қылмысты ашу, полиция бөліміне жеткізілген азамат К.-ны ұрып-соғып, тұншықтырған. Сөйтіп, жәбірленушіге тән азабын келтірген. Сол қызметтік кабинетте болған С. мен Т. азаптауды тоқтатпай, әрекетсіздік таныту арқылы азаптауға жәрдемдескен», - деп хабарлады соттың баспасөз қызметі.

Сотталушылардың кінәсі жәбірленушінің, куәлардың айғақтарымен, қалалық полиция бөлімі ғимаратынан алынған бейнежазбалармен, заттай дәлелдемелермен, сот-медициналық, сот-молекулярлық-генетикалық, сот-психологиялық-психиатриялық сараптамалардың қорытындыларымен дәлелленген.

Сот сотталушылар А., М., Ж.-ны ҚР Қылмыстық кодексінің 146-бабының 2-бөлігінің 1-тармағы (Азаптау) С. мен Т.-ны 28-бабының 5-бөлігі, 146-бабының 2-бөлігінің 1-тармағы (Азаптауға көмектесу) кінәлі деп таныды.

Сотталушыларға құқық қорғау органдарында қызмет атқару құқығынан 3 жыл мерзімге, бас бостандығын 3 жылдан 4 жылға дейінгі мерзімге айыру түріндегі жаза тағайындалды.

Жәбірленушінің моральдық зиянды өтеу туралы азаматтық талабы ішінара қанағаттандырылды.

Сот үкімі заңды күшіне енген жоқ.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!