Ақтөбеде түнгі рейд кезінде жасөспірімдерден пышақ пен бита табылды
Ақтөбе полициясы түнгі рейд кезінде 70-ке жуық жасөспірімді бөлімшеге жеткізді. Олардан пышақ, бита мен ойыншық тапанша табылды, деп хабарлайды Kazinform.
Фото: Ақтөбе облысы ПД
16:05 05.01.2024
Ақтөбенің ювеналдық полиция қызметкерлері екі күн түнгі рейдке шығып, 70-ке жуық жасөспірімді бөлімшеге жеткізді.
Оның көбі тұрғын үйдің ауласында, компьютерлік клубтар мен көшеде ата-ана қарауынсыз жүрген.
— Олардан 2 пышақ, бір бита, 1 газ баллоны және шын қаруға ұқсас ойыншық тапанша тәркіленді. 16 жастағы колледж студентінен жиналмалы пышақ тәркіленді. Тағы бір колледж студенті бита алып жүр. Полицейлер кәмелетке толмағандардың ата-аналарын және оқу орындарының басшылығын полиция бөліміне шақырып, оларға түсіндіру жұмысын жүргізді, — деді Ақтөбе облыстық ПД баспасөз қызметінің жетекшісі Ерболат Сарқұлов.
Заң бойынша сағат 23:00–ден кейін балаларын бақылаусыз жіберген ата-аналар әкімшілік жауапқа тартылып, 3 АЕК мөлшерінде айыппұл салынады.
— Кейде ата-аналар бізге ренжиді. Олар «одан да қылмыскерлерді неге ұстамайсыңдар» деп шу шығарады. Кәмелет жасқа толмаған бала кез келген уақытта өзге ортаға түсіп, шуға бой алдыруы мүмкін. Біздің мақсатымыз — балаларды қорғау, — деді Ақтөбе қаласы ПБ ювеналдық полиция бөлімшесінің бастығы Ботакөз Жалекешева.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
