«1WIN» онлайн-казино ұйымдастырушыларына халықаралық іздеу жарияланды
ҚМА Алматы облысы бойынша департаменті Қазақстан, ТМД және алыс шет ел аумағында жұмыс істеген «1WIN» онлайн-казиносының заңсыз қызметіне қатысты сотқа дейінгі тергеу жүргізіп жатыр.
11:52 09.01.2024
Қаржылық мониторинг агенттігі баспасөз қызметінің мәліметінше, онлайн-платформа заңсыз ойын бизнесін ұйымдастырумен қатар мыңдаған отандастарымызды тартып, тиісті лицензиясыз букмекерлік қызмет көрсеткен.
Ақшалай қаражат интернет-эквайринг арқылы аутентификациясыз қабылданған, бұл тіпті кәмелетке толмағандарға да құмар ойындарға қатысуға мүмкіндік берді.
2023 жылдың өзінде-ақ онлайн-казино айналымы шамамен 4 млрд теңге болған. Қазір тергеу жалғасып жатыр. Онлайн-казино сайты бұғатталды, төрт ұйымдастырушыға халықаралық іздеу жарияланды. Тәркіленуге жататын мүлікке және жалпы сомасы 1,5 млрд теңге ақшалай қаражатқа тыйым салынды. Сондай-ақ «Mercedes-Maybach S500» және «Lamborghini Huracan» автокөліктері тәркіленді.
ҚР ҚПК-нің 201-бабына сәйкес өзге де ақпарат жария етілуге жатпайды.
Қаржылық мониторинг агенттігі Қазақстан заңнамасына сәйкес елде онлайн-казино қызметіне тыйым салынғанын, ал букмекерлік қызметтер тиісті лицензия болған жағдайда ғана көрсетілетінін ескертті.
«Агенттіктің «АФМ Insider» телеграм-ботына экономикалық құқық бұзушылық фактілері туралы хабарлауыңызға болатынын естеріңізге саламыз», - делінген хабарламада.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
