СҚО-да тұмау жұқтырғандар саны артып келеді
Солтүстік Қазақстан облысында эпидемиологиялық маусым басталғалы жедел респираторлық вирустық инфекцияны 55,5 мыңнан астам адам жұқтырды, деп жазады kazinform. Бұл былтырғы сәйкес кезеңмен салыстырғанда 1,7 есе көп.
Фото: kabar.kg
09:33 19.01.2024
СҚО санитариялық-эпидемиологиялық бақылау департаментінің басшысы Әсет Жұматаевтың айтуынша, науқастардың 36 579-ы немесе 66% - 14 жасқа дейінгі балалар.
«H3N2 типті А тұмауының алғашқы жағдайы 2023 жылы 13 қарашасында тіркелді. Өткен аптадан бастап тұмаумен ауырғандар саны күрт артып отыр. Бүгінде А типті тұмау H3N2 жұқтырудың 29 жағдайы анықталды.
Ауырғандардың 37% - Петропавл тұрғындары. 30% - Қызылжар ауданында, 13% - Мағжан Жұмабаев ауданында, 10% - Ғабит Мүсірепов ауданында тіркелген», - дейді Әсет Жұматаев.
Тұмау бойынша эпидемиологиялық жағдайдың нашарлауына байланысты маман алдын алу шараларын ұмытпауды еске салады.
«Адамдар көп жиналатын жерлерде масканы қолданыңыз.
Аурудың белгілері - түшкіру немесе жөтелу бар адамдармен тығыз байланыста болудан аулақ болыңыз.
Тұмау вирусы ауа тамшылары арқылы ғана емес, сонымен қатар лас қол, мұрынның, көздің, ауыздың шырышты қабаттарымен байланыста болған кезде тұрмыстық заттар арқылы да жұғады – әсіресе көше мен қоғамдық көліктен кейін қолыңызды сабынмен үнемі жуыңыз.
Көше мен қоғамдық көліктен кейін мұрын қуысын шайыңыз.
Бөлмені үнемі желдетіп отырыңыз, бөлмедегі ауаны ылғалдандырыңыз.
Құрамында С дәрумені бар тағамдарды мүмкіндігінше көп жеңіз.
Саламатты өмір салтын ұстаныңыз, жеткілікті ұйықтаңыз, дұрыс тамақтаныңыз және үнемі дене шынықтырумен айналысыңыз.
Ауырған жағдайда дәрігерге қоңырау шалып, үйде болу керек, инфекцияның одан әрі таралуын болдырмау үшін науқас балаларды балабақшаға, мектепке жібермеу қажет», - дейді Әсет Жұматаев.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
