Атырау облысында экологияны бүлдіргендерге 48 млрд теңге айыппұл салынған

Экологияны бүлдіргендерге салынған айыппұлдың көлемі 48 млрд теңгені құраған, деп жазады kazinform.

Атырау облысы бойынша экология департаментінің басшысы Әлібек Бекмұхаметовтің мәліметіне сүйенсек, өткен жылы жоспардан тыс 33 тексеру жүргізілген. Тексеру қорытындысы бойынша экологиялық заңнама талаптарының 44 бұзушылығы анықталып, оны жою туралы 27 нұсқама берілген.

«Анықталған заң бұзушылықтарға қатысты 151 әкімшілік іс қозғалып, 48 миллиардтан астам теңге көлемінде әкімшілік айыпұл салынды. Мәселен, «Атырау мұнай өңдеу зауыты» ЖШС-ға қатысты жоспардан тыс 6 тексеру жүргізілді. Тексерулер кезінде алау қондырғысында газ жағуды белгіленген нормативте көрсетілмеген эмиссияда жүзеге асырғаны үшін ҚР Әкімшілік құқық бұзушылық туралы кодексінің 328-бабының 3-бөлігімен хаттамалар жасақталды. Сәйкесінше, сот қаулыларымен «АМӨЗ» ЖШС-ға эмиссияның тиісті көзін немесе өндірістік учаскені пайдалану туралы экологиялық рұқсатты тоқтатпай, шамамен 17 млн теңге көлемінде айыппұл салынып, толықтай өндірілді», -деді Әлібек Бекмұхаметов.

Департамент басшысының орынбасары Сырым Тілегеновтің айтуынша, өнеркәсіптік шығарындылардың сынамаларын алу үшін арнайы орындармен жабдықталмаған, эмиссияға автоматтандырылған мониторинг жүйесі енгізілмеген. Қалдықтарды басқару талаптары бұзылған. Сол себептен, ҚР Әкімшілік құқық бұзушылық туралы кодексінің 344 және 325-бабымен 862 500 теңгенің айыппұл салынған.

«Ал, «Karabatan Utility Solutions» ЖШС-нің қызметіне қатысты 4 жоспардан тыс тексеру жүргізілді. Серіктестік тарапынан қондырғыға алынған квота нормасын асыру, жерді бүлдіру, берілген нұсқаманы орындамау түріндегі бұзушылықтар анықталды. Осыған байланысты ҚР Әкімшілік құқық бұзушылық кодексінің 329 және 462-бабымен хаттамалар жасақталып, қарау үшін сотқа жолданды. Сот шешімімен «KUS» ЖШС-ға салынған 7 млрд теңге өндірілді», -деді Сырым Тілегенов.

Сондай-ақ, «Теңізшевройл», «Kazakhstan Petrochemical Industries INC.», «China National Chemical Engineering Co. LTD», «Oxygenator», «Қамқор Локомотив», «Жылыой Болашақ» ЖШС мен «Жылыой Су» МКК-ға жоспардан тыс тексеру жұмыстары жүргізілген. Тексерулердің қорытындысы бойынша 39 млрд 1 млн 231 мың теңге көлемінде айыппұл салынған.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!