Атырауда заңсыз ойын бизнесін ұйымдастыру дерегі әшкереленді
Атырауда заңсыз ойын бизнесін ұйымдастырып, көлеңкелі кәсіптен табыс тапқандар анықталды.
Фото: Kazinform
14:25 31.01.2024
Атырау облыстық экономикалық тергеп-тексеру департаментінің штаб бастығы Бекболат Әнесовтің айтуынша, облыстық прокуратураның үйлестіруімен жедел-іздестіру іс-шарасы жүргізілген, деп жазады kazinform.
«Атырау қаласында 2023 жылдың мамыр айынан осы кезге дейін заңсыз ойын бизнесін ұйымдастыру дерегін анықталды. Мұнда покер ойыны ойнатылған нысанға тінту жүргізілді. Мекен-жайдан 440 дана покер фишкасы, 294 дана ойын картасы, ойын төсеніштері, ұялы телефондар мен 2 млн 660 000 теңге ақша қаражаты, басқа да іс үшін маңызды заттар алынды», - деп хабарлады Бекболат Әнесов.
Қазір күдіктілерге қатысты ҚР Қылмыстық кодексінің 307-бабының 1-бөлігімен (Заңсыз ойын бизнесін ұйымдастыру) қылмыстық іс тіркелді. Сотқа дейінгі тергеп-тексеру жүргізіліп жатыр.
«Өзге ақпарат ҚР Қылмыстық-процестік кодексінің 201-бабына сәйкес жариялауға жатпайды. ҚР Конституциясының 77-бабы 3-тармағының 1-тармақшасына сәйкес адамның кінәлі екендігі заңды күшіне енген сот үкімімен танылғанша ол жасалған қылмысқа кінәлі емес деп есептеледі», - деп мәлім етті Бекболат Әнесов.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
