Қазақстан мен Өзбекстан арасында әуе рейстері артады
Көлік министрі Марат Қарабаев Өзбекстан Республикасының көлік саласына жауапты министрі Илхом Махкамовпен кездесті.
16:08 11.05.2024
Кездесу барысында ынтымақтастықтың негізгі бағыттары және әріптестікті одан әрі нығайту мүмкіндіктері, сондай-ақ халықаралық көлік дәліздерін, теміржол және автомобиль көлігін дамыту, көлік инфрақұрылымын салу салаларындағы бірлескен жобаларды іске асыру мәселесі талқыланды.
Атап айтқанда, бүгінгі таңда Дарбаза мен Мақтаарал арасындағы жаңа теміржол желісінің құрылысы бойынша жұмыс жүріп жатыр.
Жобаны іске асыру екі ел арасындағы жүк өткізу қабілетін тағы 10 млн тоннаға арттыруға мүмкіндік береді деп жоспарланып отыр.
Автотасымал саласындағы ынтымақтастық туралы айта келе, елдер арасындағы автотасымалдар Үкіметаралық келісім негізінде жүзеге асатынын атап өткен жөн.
«Өткен жылы автокөлікпен экспорттық-импорттық тасымалдау көлемі 6 пайызға ұлғайып, 1,8 млн тоннаны құрады. Жалпы автотасымалдау саласындағы ынтымақтастықты дамытуда оң серпін байқалады», — деп атап өтті Марат Қарабаев.
Азаматтық авиация көлік-логистикалық хабтың негізгі қозғаушы күші. Қазіргі уақытта Қазақстан мен Өзбекстан қалалары арасында аптасына 37 рейс орындалады.
Өткен жылы Ташкентте Қазақстан мен Өзбекстанның авиациялық билік органдары арасында келіссөздер өткен болатын.
Келіссөз Барысында тараптар рейстер санын одан әрі ұлғайту және ұшу географиясын кеңейту мәселелерін талқылап, рұқсат етілген рейс санын Астана — Ташкент бағыттары бойынша аптасына 12 рейстен 36 рейске дейін, Алматы-Ташкент бағыттары бойынша аптасына 20 рейстен 36 рейске дейін, ал қалған маршруттарда аптасына 4 рейске дейін ұлғайтуға уағдаласты.
«Термез-Мазари-Шариф-Кабул-Пешавар» теміржолының құрылысына келетін болсақ, қазақстандық тарап Өзбекстанның бұл бастамасын қолдайды.
«Жобаны іске асыру Орталық Азия елдері үшін өңірлік қатынас пен сауданы дамытуға ықпал ететініне сенімдімін, өйткені Оңтүстік Азия өңірінің ірі теңіз порттарына қолжетімділік ашылады», - деді ведомство басшысы.
Тұтастай алғанда екі ел арасындағы жүктерді автокөлікпен тасымалдау және транзиттеу үкіметаралық келісімге сәйкес рұқсатсыз негізде жүзеге асырылады.
Кездесу қорытындысы бойынша тараптар 2024-2025 жылдар аралығында Қазақстан мен Өзбекстан арасындағы көлік және логистика саласындағы стратегиялық ынтымақтастықты дамыту жөніндегі Жол картасына қол қойды.
Кездесуді қорытындылай келе тараптар күн тәртібіндегі өзекті мәселелер бойынша пікір алмасты.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!