Ертіс өзеніне батып кеткен кеме капитаны бес тәуліктен бері іздестіріліп жатыр
Сүңгуірлер өзен арнасының жағаға жақын бөліктерінде суға сүңгімей-ақ іздестіру жұмыстарын жалғастыруда. Ол үшін жүзу құралдары мен эхолот пайдаланылып жатыр.
Фото: polisia.kz
18:20 13.05.2024
Бұған дейін хабарлағанымыздай, 8 мамыр күні түнгі уақытта Ертіс өзенінде кеме капитаны суға батып кетті.
Өңірлік төтенше жағдайлар департаментінің өкілдері кеме капитанын іздеу бес тәуліктен бері жалғасып жатқанын хабарлады.
«Кеме капитанының мүрдесі әзірше табылған жоқ. Ертіс өзенінің жаға шегінде құтқарушылар іздестіру жұмыстарын белсенді түрде жүргізіп жатыр. Олар суға сүңгімей-ақ, жүзу құралдары мен эхолоттың көмегін пайдаланып, өзен түбін сүзіп келеді. Іздестіру-құтқару шараларына 2 құтқарушы, жергілікті атқарушы орган мен капитан жұмыс істеген ұйымның өкілдері жұмылдырылған», - деп атап өтті Павлодар облысы төтенше жағдайлар департаменті азаматтық қорғаныс басқармасының офицері Темірлан Жапалбай.
Оның сөзінше, кеме командасы жағажай маңын тазарту және абаттандыру шараларымен айналысқан.
Қазіргі уақытта полиция аталған жайт бойынша қылмыстық іс қозғап, тергеу-тексеру жүргізіліп жатыр.
Дереккөз: Kazinform
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
