Алакөлге құлаған әуе кемесінің ұшуға рұқсаты болмаған — комитет
Азаматтық авиация комитеті 25 шілдеде Алакөлде болған әуе апатына қатысты тексеру жүргізді. Бұл әуе кемесі азаматтық әуе көліктерінің мемлекеттік тізімінде тіркелмеген, тиісінше ұшуға жарамды деген сертификаты да жоқ болып шықты.
Фото: ТЖМ
11:43 29.07.2024
Еске сала кетейік, 25 шілдеде Жетісу облысы Алакөл ауданы Ақши ауылы маңында Алакөл көліне дельтаплан құлаған болатын. Салдарынан екі адам зардап шегіп, ауруханаға жеткізілді.
Комитет сол кезде тергеу шараларын бастап кетті. Соның нәтижесінде бұл әуе кемесінің азаматтық әуе кемелерінің мемлекеттік тізімінде тіркелмегені, тиісінше ұшуға жарамды деген сертификаты болмағаны анықталды. Ұшқышта авиация персоналының қолданыстағы куәлігі де жоқ.
«Әуе кемесінің құлау себептерін тергеумен құқық қорғау органдары айналысады. Әлеуметтік желілерде әуе кемелерінде, шарда және өзге де ұшу аппараттарында әуе сапарын жарнамалау жағдайлары жиілеп кетті», - дейді комитеттен.
Әуе көлігін таңдау кезінде қауіпсіздіктің негізгі аспектілерін ескеру маңызды:
— әуе кемесінің иесінің уәкілетті органдар берген барлық қажетті лицензиялары мен сертификаттары бар екеніне көз жеткізіңіз;
— әуе кемесіне техникалық қызмет көрсету қашан жүргізілгенін біліңіз;
— ұшқыштың тәжірибесі мен біліктілігі туралы сұраңыз. Оның әуе кемесінің белгілі бір түрін басқару үшін жеткілікті тәжірибесі болуы қажет;
— әуе кемесінің иесі өзінің азаматтық-құқықтық жауапкершілігін, соның ішінде жолаушылар алдындағы жауапкершілігін сақтандырғанына көз жеткізіңіз;
— ұшу алдында қауіпсіздік бойынша нұсқама мен көрсетілім өткізілуі тиіс. Бұл сізге төтенше жағдайда қалай әрекет ету керектігін білуге көмектеседі;
— барлық апаттық-құтқару жабдықтары (мысалы, құтқару кеудешелері) жарамды күйде екендігіне көз жеткізіңіз;
— ұшу алдында ауа-райының ұшу үшін қауіпсіз екеніне көз жеткізіңіз. Қолайсыз ауа райында ұшудан аулақ болыңыз.
«Ұшу қауіпсіздігіне күмәніңіз болса, ақпарат алу үшін Азаматтық авиация комитетіне және „Қазақстанның авиациялық әкімшілігі“ АҚ-ға хабарласыңыз», - дейді мамандар.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
